Rossiya Federal xavfsizlik xizmati Ximki shahrida bo‘lib o‘tgan otishmada Moskvadagi odamlar ko‘p to‘planadigan joyda uyushtirilishi rejalashtirilgan teraktning oldini oldi va uni rejalashtirgan Markaziy Osiyo fuqarosini yo‘q qildi. Bu haqda “Interfaks” xabar berdi.
Ma’lum qilinishicha, terakt maxsus xizmat xodimlari hamda Ichki ishlar vazirligi va Rossiya Tergov qo‘mitasi xodimlari hamkorligida bartaraf qilingan.
Qayd etilishicha, maxsus xizmat va huquqni muhofaza qiluvchi idoralar xodimlari Ximki shahridagi tashlandiq garajlar hududida shubhali erkakni aniqlagan. Erkak uni qo‘lga olish va hujjatlarini tekshirish jarayonida kuch tuzilmalariga qarata avtomatdan o‘t ochgan.
Otishma vaqtida jinoyatchi yo‘q qilingan. Hodisa joyini ko‘zdan kechirish paytida jinoyatchining yonida “AK-74” avtomati, uchta o‘qlangan o‘qdon, ikkita “F-1” va bitta “RGD” granatasi topilgan.
Bundan tashqari, FXX jinoyatchi tomonidan ijaraga olingan kvartiradagi tintuv paytida uning Suriyadagi xalqaro terrorchilar emissarlari bilan bog‘liqligi va odamlarni ommaviy o‘qqa tutishga tayyorgarlik ko‘rgani haqida qo‘shimcha ma’lumot olingan.
Ayni paytda yo‘q qilingan jinoyatchining Markaziy Osiyo davlatlaridan birining fuqarosi ekanligi aniqlandi. Bundan tashqari, uning akasi Moskva viloyatida qo‘lga olingan, u tanishlari orqali ukasini xalqaro terrorchilik tashkilotiga a’zo bo‘lish uchun Suriyaga borishdan qaytarish uchun bir necha kun davomida qidirgan. Ayni paytda terrorchining ehtimoliy sheriklarini qidirish ishlari olib borilmoqda.
Ma’lum qilinishicha, jinoiy ish bo‘yicha sud-ballistik ekspertizalar tayinlangan. Ushbu holat bo‘yicha huquq-tartibot idoralari xodimining hayotiga tajovuz qilish moddasi bo‘yicha jinoiy ish qo‘zg‘atilgan.
Otib tashlangan jinoyatchining akasi ma’lum qilishicha, ukasi ikki hafta oldin g‘oyib bo‘lgan va u ukasining yo‘qolgani haqida Rossiya Ichki ishlar vazirligiga darhol xabar bergan.
“Men uning suriyalik terrorchilar bilan aloqada bo‘lganidan shubhalana boshladim. Ikki hafta oldin u bedarak yo‘qoldi. Men darhol Rossiya Ichki ishlar vazirligiga xabar berdim”, — deya ma’lum qilgan jinoyatchining akasi.
“Interfaks”ning aniqlashicha, jinoyatchining yonidan 19 yoshli Tojikiston fuqarosi Odil Qayumovning hujjatlari topilgan.
Avvalroq Rossiya Federal xavfsizlik xizmati Moskva, Novosibirsk shaharlarida va Krasnoyarsk o‘lkasida “O‘zbekiston islom harakati”ning 22 nafar a’zosini qo‘lga olib, teraktning oldini olgandi.
Izoh (0)