Қандли диабети бор коронавирусга чалинган беморлар бошқа беморларга қараганда олти маротаба кўпроқ шифохонага мурожаат қилмоқда ва улар 12 баробар кўпроқ COVID-19 қурбонига айланмоқда. Калифорния университети мутахассислари томонидан ўтказилган бу борадаги тадқиқот натижалари MedicalXpress журналида чоп этилди.
Экспертларнинг аниқлашича, диабет COVID-19 билан касалланишнинг оғир шаклига олиб келадиган омиллар орасида иккинчи ўринни эгалламоқда. Биринчи ўринда эса — юрак-қон томир касалликлари.
Университет профессори Пракаш Дидванининг сўзларига кўра, диабети бор беморлар организмида иммун ҳимоя функцияси пасайиб кетади. У қандли диабети бор инсонларга мунтазам қондаги қанд миқдорини ўлчаш ва шифокорларда билан алоқада бўлиб туришни маслаҳат берган. Бундан ташқари, бу турдаги беморлар кўпроқ фаол ҳаёт тарзини ўтказишлари ва яхши ухлашлари керак.
Ўз навбатида Векснер университети (Огайо) тиббиёт маркази Эндокринология, диабет ва метоболизм бўлими шифокори Жошуа Жозеф қонда қанд миқдори даражаси юқори бўлган беморларга ўзини даволовчи шифкорлар ва ижтимоий ишчилар билан мунтазам алоқада бўлишни тавсия қилган.
Жозефнинг таъкидлашича, шифокорлар глюкоза миқдорининг кўпайиши каби хавфли бўлган гипогликемия пайдо бўлишини кузатиши зарур.
Мутахассиснинг таъкидлашича, бу каби масалада телемедицина ҳам фойда бериши мумкин. Жозефнинг сўзларига кўра, шу орқали беморлар қондаги қанд миқдори ва бошқа кўрсаткичлар бўйича маълумотларни узата олиши, шифокорлар эса бунинг асосида зарурий қарорлар қабул қилиши мумкин.
Аввалроқ франциялик тадқиқотчилар коронавирус инфекцияси билан касалланган инсонларнинг 80 фоизида буйрагига зарар етиши билдирганди. АҚШдаги турли тадқиқот марказлари олимлари касаллик инсоннинг бутун организмига таъсир кўрсатиши ва салбий оқибатлар яна узоқ йил сақланиб қолинишини маълум қилган.
Изоҳ (0)