Rossiya Federal xavfsizlik xizmati Moskva, Novosibirsk shaharlarida va Krasnoyarsk o‘lkasida “O‘zbekiston islom harakati” hujralarining 22 nafar a’zosini qo‘lga oldi. Bu haqda “RIA Novosti” xabar berdi.

Qo‘lga olinganlar teraktlar tayyorlagan, shuningdek, ular tashkilotga yangi a’zolar yig‘ish va ularni jangovar harakatlar hududlariga o‘tkazish, Suriyadagi terrorchilarni moliyalashtirish bilan shug‘ullangan.

Qo‘lga olish chog‘ida terrorchilik tashkilotlari a’zolaridan taqiqlangan diniy adabiyotlar, jangarilarni targ‘ib qiluvchi videomateriallar, shuningdek, qalbaki pasportlar olingan.

Ma’lum qilinishicha, mazkur terakt 2020-yil iyun oyining boshidan buyon maxsus xizmatlar tomonidan oldi olingan yettinchi terakt bo‘ldi. Avvalroq FXX Kabarda-Balkariyada kuch tuzilmalariga qarshi hujumning oldini olgan.

Bir yarim oy ichida Xabarovsk o‘lkasida, Rostov viloyatida, Astraxanda, Vladivostokda, Simferopolda va Chuvashistonda jangarilar hujumlarining oldi olingan, yil boshidan buyon 17 ta shunday holat qayd etilgan.

FXX direktori Aleksandr Bortnikovning iyun oyida bergan ma’lumotlariga ko‘ra, so‘nggi o‘n yilda Rossiyada 160 ta, 2019-yilda esa 43 ta teraktga yo‘l qo‘yilmagan.