Москвада Қурбон ҳайити намози фақат жоме масжидида ўқилади. Унда фақатгина диний идора вакиллари иштирок этиши белгиланган. Бу ҳақда Россия мусулмонлари диний идораси Уламолар кенгаши қарорида келтирилган.
«Янги турдаги коронавирус инфекцияси хавфи сабаб Москвадаги жоме масжидида байрам намози имомлар, муаззинлар ва муфтий ўринбосарлари иштирокида ўқилади. Бошқа масжидларда, шунингдек, мусулмонларнинг маҳаллий диний ташкилотларида байрам намозини ўтказиш тавсия этилмайди», — дейилади хабарда.
Мусулмонлар диний идораси таркибига кирувчи Минтақавий мусулмонлар диний бошқармалари ҳудуддаги эпидемиологик вазиятдан келиб чиқиб байрам намозларини ўтказиш бўйича қарорларни мустақил қабул қилади.
Уламолар кенгаши барча мусулмонларга онлайн режимда муфтийнинг байрам ваъзини эшитиш ва у тугаши билан мустақил байрам намозини ўқиш тавсия қилинган. «Анъанавий равишда ‘Россия 1’ федерал канали орқали Россия мусулмонлари диний идораси раиси, муфтий шайх Равил Гайнутдиннинг ваъзини тинглаш мумкин», — дейилади хабарда.
Аввалроқ Ўзбекистон мусулмонлари идораси Мисрдаги «Дорул Ифто» фатво ҳайъатига таяниб, Қурбон ҳайитининг биринчи куни 31 июлга тўғри келишини маълум қилганди. Ўзбекистон Президентининг тегишли қарор билан мамлакатда Қурбон ҳайити 31 июль куни нишонланади. Аммо мамлакатдаги вазият сабаб Ўзбекистон мусулмонлари идораси пандемия вақтида Қурбон ҳайити намози мусулмонлар зиммасидан соқит бўлганини маълум қилиб, мусулмонларга ўз хонадонларида тўрт ракатли нафл намозини ўқиш тавсия этилди.
Изоҳ (0)