Қирғизистонда 30 июль коронавирус қурбонлари хотирасига миллий Мотам куни деб эълон қилинади. Бу ҳақда «Биринчи радио» давлат радиостанциясининг эфири вақтида Қирғизистон президенти Сўронбой Жээнбеков маълум қилди.

«Ушбу кунда вафот этган ҳамюртларимизни хотирлаш учун Қуръон ўқиймиз. Яна бир бор вафот этган юртдошларимизнинг қариндошлари ва яқинларига ҳамдардлик билдираман. Ҳар бир қирғизистонлик юрагида қийинчилик, оғир йўқотишлар мавжуд. Шу сабабли ҳамюртларимизга сабр ва матонат тилайман. Ўтганларнинг охирати обод бўлсин», — дейди президент Жээнбеков.

Аввалроқ Қирғизистонга Россия Соғлиқни сақлаш вазирлиги мутахассислари коронавирус тарқалишига қарши курашда ёрдам кўрсатиш учун ФВВ махсус борти учиб келгани тўғрисида хабар берилганди. Идора маълумотларига кўра, Бишкекка Москвадан 7 нафар мутахассис, Уфадан эса 42 нафар тиббиёт ходими учиб келган.

Қирғизистон Соғлиқни сақлаш вазирлигининг сўнгги маълумотларига кўра, мамлакатда коронавирус билан касалланганлар сони 32 124 кишига, вирус қурбонлари эса 1249 кишига етган.

Эслатиб ўтамиз, Қозоғистонда 13 июль — коронавирус инфекциясидан вафот этган фуқаролар хотираси учун Мотам куни деб эълон қилинди. Шу муносабат билан коронавирус пандемияси қурбонига айланган фуқаролар хотирасига бутун мамлакат бўйлаб Нур-Султон вақти билан соат 12:00 да бир дақиқалик сукут сақланди.