Эрон АҚШнинг F-15 қирувчи самолёти Сурия осмонида парвоз қилган Mahan Air авиакомпаниясига тегишли йўловчи самолётга яқинлашиб, унинг йўналишини ўзгартиришга мажбур қилгани учун жавоб чоралари кўрилишини ваъда қилди. Бу ҳақда Meduza хабар берди.
«Эрон ўз фуқароларига қарши хатти-ҳаракатларни жавобсиз қолдирмайди ва вақт келганда мантиқсиз хатти-ҳаракатларга кескин ва муносиб жавоб беради», — дея маълум қилган Эрон Ташқи ишлар вазирлиги. Бироқ вазирлик айнан қандай чоралар кўрилишини маълум қилмаган.
Эслатиб ўтамиз, 23 июль куни кечаси АҚШнинг F-15 қирувчи самолёти Теҳрон—Байрут йўналиши бўйича учаётган Mahan Air авиакомпаниясига тегишли йўловчи самолётига яқинлашган. Тўқнашувдан қочиш мақсадида йўловчи самолёти зудлик билан баландликни ўзгартирган. Тезкор амалга оширилган манёврлар сабаб бир неча йўловчига жароҳат етган. Натижада самолёт Байрутга қўнган.
АҚШ Қуролли кучлари марказий қўмондонлиги F-15 қирувчи самолёти Сурия узра парвоз қилган Mahan Air авиакомпаниясига тегишли йўловчи самолётга хавфсиз масофада — 1000 метр узоқликда яқинлашганини маълум қилган.
Эрон ТИВ махсус вакили Аббос Мусавий ушбу кўнгилсиз ҳодисага изоҳ берар экан, Эрон самолёти билан бирор нарса содир бўлса, бунга АҚШ жавобгар бўлишини маълум қилган. Мусавийнинг сўзларига кўра, Эроннинг БМТдаги доимий вакили содир бўлган воқеадан сўнг БМТ бош котиби Антониу Гуттериш билан учрашган.
Изоҳ (0)