Хоразм ҳокимининг аҳолига мурожаатидан сўнг вилоятга 20 та тез тиббий ёрдам машинаси олиб келинди

Хоразм вилояти ҳокими Фарҳод Эрмановнинг коронавирусга қарши курашиш бўйича вилоятдаги вазият юзасидан аҳолига қилган мурожаатидан сўнг ҳудуддаги мавжуд 145 та тез тиббий ёрдам машинасига қўшимча яна 20 та машина олиб келинди. Бу ҳақда «Дарё»га вилоят ҳокимлиги хабар берди.

Таъкидланишича, 2020 йил 20 июль куни вилоят бюджетининг қўшимча манбалари ҳисобидан зарур воситалар билан жиҳозланган 20 та Damas сотиб олиниб, муассасаларга берилди. Натижада 110 нафар шифокор, 110 нафар ҳамшира ва 90 нафар ҳайдовчи учун янги иш ўрни яратилди.

Қўшимча қилинишича, Хоразм вилоятида 1180 нафар бемор учун жой ҳозирланиши белгиланган бўлиб, 3 мингта ўрин яратиш чоралари кўрилмоқда. Мазкур ўринга жойлаштириладиган беморлар учун 4500 дан ортиқ шифокорга эҳтиёж сезилиши ҳисобга олиниб, нафақадаги 800 нафар шифокор, 20 минг нафар ҳамшира ишга жалб қилинди.

Эслатиб ўтамиз, Фарҳод Эрмановнинг вилоят аҳлига қилган мурожаатида Урганч давлат университети биносида 22 та ташкилот ходимларидан иборат Call-марказ ташкил этилгани, қўшимча машиналар берилиши айтиб ўтилганди.