Ўзбекистонда 23 июль соат 10:00 ҳолатига кўра расман 8560 киши коронавирусдан даволанмоқда. Бу ҳақда Соғлиқни сақлаш вазирлиги хабар берди. Қайд этиш жоиз, бу вақтга келиб жами касалланиш ҳолатлари сони 18 531 тага етган (расмий статистика бўйича, 99 та ҳолатда беморлар вафот этган).
«Ҳозирда мамлакатимизда 8560 нафар беморга шифокорларимиз томонидан белгиланган стандартлар бўйича даво чоралари кўрилмоқда», дейилади вазирлик ахборотида. Уларнинг қанчасида касаллик аломатларсиз (симптомларсиз) кечаётгани маълум қилинмаган. Маълумот учун, 5 июлдан бошлаб касаллик енгил (симптомларсиз) кечаётган беморлар уй шароитида даволанишига рухсат берилган.
Мавзуга доир: Ўзбекистонда қанча беморнинг коронавирус инфекциясидан уйда даволанаётгани маълум қилинди
Соғлиқни сақлаш вазирлигининг қўшимча қилишича, айни вақтда даволанаётган 8560 нафар беморнинг 127 нафари оғир аҳволда, шундан 27 нафарининг аҳволи ўта оғир. Қайд этиш жоиз, оғир аҳволдаги беморлар сони 20 июлдан бери расман 100 нафардан камаймаяпти — шу куни ва 21 июлда 104 нафардан беморнинг, 22 июль куни эса 133 беморнинг аҳволи оғир экани расман маълум қилинган эди.
Изоҳ (0)