Samarqand viloyati aholisiga murojaat bilan chiqqan hokim Erkinjon Turdimov koronavirusga qarshi kurashilayotgan og‘ir vaziyatda 99 foiz shifokorlar o‘z vazifasini a’lo darajada, sidqidildan bajarayotganini ta’kidladi.
“Hamma ‘shifokor uyimizga kelsin’, deydi. Shifokor uyga bormaydi. Agar infeksiya bilan kasallangan odamning uyiga shifokorlar boradigan bo‘lsa, biz shifokorlarni yo‘qotib qo‘yamiz. Shuning uchun isitmasi ko‘tarilgan, COVID-19’ belgilari bo‘lgan bemorlarni ko‘rish uchun shifokor bormaydi, — dedi viloyat hokimi Erkinjon Turdimov. — Agar biz hamma telefonda bo‘ladigan murojaatlarga ularni yuboradigan bo‘lsak, ertaga nima bo‘ladi, shifokorlar kasal bo‘ladi. Biz shifokorlarni asrashimiz, ularga e’tiborimizni kuchaytirishimiz kerak”, — dedi viloyat hokimi.
Erkinjon Turdimovning aytishicha, viloyatda tor sohadagi mutaxassislar yetarli emas.
“Shifokorlarni yomon deyish oson. 14 kun bir ‘smena’da maxsus kiyim kiyib, kasallarning orasida yurishning o‘zi bo‘ladimi? O‘zingiz uyingizda vrachlar kiyimini bir soat kiyib, yurib ko‘ring, undan keyin baho bering, — dedi Erkinjon Turdimov. — Yaxshini ham yomon deb bezdirib qo‘yishimiz mumkin. Lekin yomonni ham yaxshilab ishlatishimiz mumkin. Uyda o‘tirib baho berish juda oson. Shuning uchun men tibbiyot xodimlariga tashakkur izhor qilmoqchiman. Bugun biz koronavirusga qarshi urush qilyapmiz. Bu jangning oldida tibbiyot xodimlari turibdi. Bir kunda tez yordamga 1700-2000 ta qo‘ng‘iroq bo‘ladi. Oddiygina bitta shifokor besh marotaba chaqiriqqa borib keldi deylik, 400 nafar shifokorni qayerdan topamiz. Ular ko‘chama-ko‘cha yuradigan bo‘lsa, kasallarni kim davolaydi?”.
Erkinjon Turdimovning ma’lum qilishicha, hozirgi kunda Samarqand viloyatida 291 nafar anesteziolog-reanimatolog, 115 nafar infeksionist, 165 nafar vrach-lobarant, 17 nafar vrach-epidimolog faoliyat yuritmoqda. Viloyat sog‘liqni saqlash tizimida faoliyat ko‘rsatayotgan tibbiyot xodimlarini Samarqand tibbiyot instituti professor-o‘qituvchilari yordami bilan onlayn shaklda 144 soatlik o‘qitish tashkil qilingan. Shuningdek, COVID-19’ga chalingan va shifoxonalarda davolanayotgan bemorlarga tor mutaxassislar tomonidan doimiy ravishda onlayn maslahat yo‘lga qo‘yilgan.
“Institut professor-o‘qituvchilari tomonidan COVID-19 kasalligiga chalinganda uyda davolanishi mumkin bo‘lgan bemorlar uchun kasallikdan ambulator shaklda davolanish yuzasidan muxsus qo‘llanmalar tayyorlangan va viloyat aholisiga tarqatilgan”, — dedi Turdimov.
