Тошкентда коронавирус инфекцияси асоратлари оқибатида Олмазор туманида яшаган 55 ёшли эркак вафот этди. Бу ҳақда Соғлиқни сақлаш вазирлиги 23 июль куни хабар берди.
Хабар беришларича, фуқаро Р.Ш.да 19 июль куни коронавирус тасдиқланган ва у Тошкент тиббиёт академияси кўп тармоқли клиникасига ётқизилган. Унга COVID-19 инфекцияси ўта оғир кечиши, икки томонлама пневмония ташхиси қўйилган.
Қайд этишларича, хасталик ўткир нафас етишмовчилиги, ўткир респиратор дистресс синдроми, ўткир юрак қон-томир етишмовчилиги асоратлари билан кечган. Шунингдек, юрак ишемик касаллиги, стенокардия ҳамда гипертония, семизлик 3-даража каби ҳамроҳ касалликлар билан ҳам оғриган.
«Шифокорлар томонидан стандартлар асосида ўтказилган реанимацион муолажаларга қарамай, беморнинг аҳволи кескин оғирлашиб, ўткир нафас ва юрак қон-томир етишмовчилигидан вафот этган», — дейилади Соғлиқни сақлаш вазирлиги ахборотида. Бемор айнан қайси санада вафот этганига аниқлик киритилмаган.
Бу — Ўзбекистон Соғлиқни сақлаш вазирлиги ҳисоби бўйича мамлакатдаги коронавирус оқибатида 99-ўлим ҳолатидир. «Дарё» ҳисоби бўйича коронавирус асоратлари оқибатида вафот этганлар сони 104 нафарни ташкил этмоқда.
Жумладан, Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Шунингдек, 22 июлда Ўзбекистон бош прокурорининг собиқ ўринбосари Ҳакимбай Халимов 66 ёшида коронавирус асоратларидан вафот этгани хабар қилинди.
Бироқ ушбу ҳолатлар ҳақида ССВ томонидан айни вақтгача ахборот берилмаган. Шунингдек, таниқли режиссёр Сарвар Каримов 17 июль куни отаси коронавирус инфекциясидан вафот этгани, аммо унга ташхис қўйилмаганини маълум қилганди.
Изоҳ (0)