Ўзбекистонда коронавирсга қарши курашаётган бир гуруҳ тиббиёт, Ички ишлар, Мудофаа ва Фавқулодда вазиятлар вазирликлари ҳамда Миллий гвардия ходимлари ва бошқа ташкилотчилар фахрий унвон, орден ва медаллар билан мукофотланади. Бу ҳақда Президенти Шавкат Мирзиёев 23 июль, пайшанба куни бўлиб ўтган навбатдаги видеоселектор йиғилишида маълум қилди.
«Шу ўринда ўз ҳаёти ва соғлиғини хавф остига қўйиб, касалликка қарши мардона курашаётган фидойи шифокорларимизга ҳар қанча раҳматлар айтсак, арзийди. Бугун коронавирус пандемияси шароитида аҳоли саломатлигини муҳофаза қилиш ва ҳаётини асраш, юртимизда инфекцияни жиловлашда улкан жасорат ва фидойилик намуналарини кўрсатган бир гуруҳ тиббиёт, Ички ишлар, Мудофаа ва Фавқулодда вазиятлар вазирликлари ҳамда Миллий гвардия ходимларини ва бошқа ташкилотчиларни фахрий унвон, орден ва медаллар билан мукофотлаш тўғрисидаги фармонни имзоладим», — деди давлат раҳбари.
Мавзуга доир: Ўзбекистонда карантин чекловлари яна узайтирилади
Маълум қилинишича, пневмонияни даволашда нафақат ўзбекистонлик шифокорлар, балки видеоалоқа орқали хориждаги етакчи мутахассислар консультация беришга жалб қилинмоқда.
«Ҳозирги вақтда германиялик тиббиёт профессори юртимизга келиб, даволаш жараёнларида бевосита иштирок этмоқда. Бугун Туркиядан бир гуруҳ профессорлар етиб келади. Бошқа давлатлардан ҳам энг тажрибали мутахассисларни жалб қилиш бўйича иш олиб боряпмиз», — деди Шавкат Мирзиёев.
Шунингдек, йиғилишда давлат раҳбари амалдаги карантин чекловлари яна узайтирилишини маълум қилди. Бундан ташқари, Президент мамлакатда коронвирус билан бирга пневмония ҳам тарқалаётганини маълум қилди.
Эслатиб ўтамиз, Ўзбекистонда коронавируснинг биринчи тўлқинига қарши курашда 15 нафар хитойлик шифокор ва 1 нафар кореялик мутахассис ҳам иштирок этганди.
Изоҳ (0)