Ўзбекистон Президенти Шавкат Мирзиёев раислигида навбатдаги видеоселектор йиғилиши бўлиб ўтмоқда. Тадбир аввалида мамлакат пандемияга қарши қандай кураш олиб бораётганига алоҳида тўхталиб ўтилди. Бу ҳақда Президент матбуот хизмати хабар берди.
Мавзуга доир: Ўзбекистонда карантин чекловлари яна узайтирилади
Шавкат Мирзиёев ҳозирда COVID-19 юқтирганлар сони 18 700 нафардан ошгани, вазият ҳамон жиддий бўлиб қолаётганини таъкидлади.
«Аҳволи оғир беморлар сони кўпайиб бормоқда. Коронавирусга қўшимча равишда пневмония ҳолатлари ҳам кенг тарқалмоқда. Шу сабабли, охирги 10 кунда 4 та селектор ўтказиб, ҳокимлар, вазирлар ва бошқа мутасадди раҳбарларга қўшимча даволаш ўринларини ташкил этиш, симптомсиз касалларни уйда тизимли даволаш, уларни зарур дори-дармон ва озиқ-овқат билан таъминлаш, тез тиббий ёрдам тизими ишини яхшилаш бўйича тегишли топшириқлар берган эдим. Бугун ҳисоботларни эшитамиз», — деди давлат раҳбари.
Президентнинг маълум қилишича, охирги кунларда коронавирусни даволаш учун қўшимча 46,5 мингта ўрин ажратилган, яна 31 мингта ўрин ташкил этилади, 397 та тез тиббий ёрдам машинаси харид қилинган, бир ой муддатда яна 409 та машина жойларга етказилади.
Таъкидланишича, халқаро ва маҳаллий тажрибани ҳисобга олиб, коронавирусни даволаш стратегияси ва тактикаси янгиланди. Тиббиёт олий ўқув юртлари ва коллежлари профессор-ўқитувчилари, илмий ходимлар ва пенсияга чиққан мутахассислар орасидан жами 5 минг шифокор ҳамда 9 минг нафар ҳамшира беморларни даволаш ва маслаҳат беришга жалб этилди.
Эслатиб ўтамиз, Шавкат Мирзиёев 14 июль куни бўлиб ўтган видеоселектор йиғилишида Ўзбекистонда коронавирусни даволаш стратегиясини ўзгартириш бўйича топшириқ берганди. Шунингдек, давлат раҳбари ҳудудлар раҳбарларига тиббиёт коллежлари битирувчиларини ишга жалб қилиш ҳақида кўрсатма берганди.
Аввалроқ Самарқанд вилояти соғлиқни сақлаш бошқармаси бошлиғи Давронбек Жуманиёзов ҳозирги пайтда коронавирус инфекцияси март—апрель ойларидагига қараганда бошқача кечаётгани, касалланган беморларнинг кўпчилигида икки томонлама пневмония аниқланаётгани, пневмония аниқланган баъзи беморларда коронавируснинг ўзи мавжуд эмаслигини маълум қилганди.
Ўзбекистонда 23 июль соат 10:00 ҳолатига кўра расман 8560 киши коронавирусдан даволанмоқда. Соғлиқни сақлаш вазирлигининг маълумотларига кўра, айни вақтда даволанаётган 8560 нафар беморнинг 127 нафари оғир аҳволда, шундан 27 нафарининг аҳволи ўта оғир. Қайд этиш жоиз, оғир аҳволдаги беморлар сони 20 июлдан бери расман 100 нафардан камаймаяпти — шу куни ва 21 июлда 104 нафардан беморнинг, 22 июль куни эса 133 беморнинг аҳволи оғир экани расман маълум қилинган эди.
Изоҳ (0)