Қашқадарё вилояти Санитария-эпидемиология осойишталик маркази (СЭОМ) Китоб тумани филиали бошлиғи пора билан қўлга тушди. Бу ҳақда Бош прокуратура матбуот хизматига таяниб «Kun.uz» хабар бермоқда.
Маълум бўлишича, СЭОМ Китоб туман филиали бошлиғи Қ.Н. фуқаро М.Ю.дан фуқаролар томонидан карантин қоидаларини бузиб, ниқобсиз юрганликлари ҳолати юзасидан унга нисбатан қонуний чора кўрмаслик эвазига 800 минг пора талаб қилган. Шундан 600 минг сўмни олган вақтида департаментнинг Китоб туман бўлими томонидан ўтказилган тезкор тадбирда ашёвий далиллар билан ушланган.
Мазкур ҳолат юзасидан филиал бошлиғи Қ.Н.га нисбатан Жиноят кодексининг 210-моддаси (Пора олиш) 2-қисми «в» банди билан жиноят иши қўзғатилиб, тергов ҳаракатлари ўтказилмоқда.
Бундан ташқари, Санитария-эпидемиология осойишталик марказларга ажратилган пулларнинг талон-торож қилиниши билан боғлиқ кўплаб ҳолатлар аниқланмоқда. Хусусан, Андижон вилоятида СЭОМ мансабдор шахслари 159,3 миллион сўм миқдордаги бюджет маблағларини талон-торож қилган. Шунингдек, Қашқадарё вилоят СЭОМда 917,8 миллион сўм, Наманган вилоят СЭОМда 248,9 миллион сўм, Навоий вилоят СЭОМда 222,3 миллион сўм, Бухоро вилоят СЭОМда 204,6 миллион сўм маблағ талон-торож бўлгани аниқланган эди.
Бу ҳолатларнинг барчаси дезинфекция воситаларини бозор нархидан қиммат нархларда харид қилиш билан боғлиқ.
Изоҳ (0)