Тошкентнинг Юнусобод туманидаги «Ўзэкспомарказ» павильонларида коронавирувсга чалинган беморларни жойлаштириш учун 500 кишига мўлжалланган койка-ўринлар ташкил қилингани хабар берилган эди. Пойтахт ҳокимлиги матбуот хизматининг маълум қилишича, ушбу марказга тиббиёт ходимлари ишга таклиф этилмоқда.
Қайд этилишича, иш 15 кунлик навбатчилик тартибида ташкил қилинади ҳамда ходимларга қуйидаги умумий ҳисобдан:
- врачларга 15 000 000 сўм;
- ҳамшираларга 10 000 000 сўм;
- кичик тиббиёт ходимларига 5 000 000 сўм;
- кўнгиллиларга 5 000 000 сўм кунлик тартибда иш ҳақи тўланади.
Тиббиёт ходимлари тиббий ҳимоя воситалари билан таъминланади. Ходимларга ётоқхона ва овқатланиш тўлиқ ташкил қилингани ҳолда, маошлари ҳар куни тўлаб борилади. Таклифга қизиқиш билдирганлар қуйидаги телефон рақамлари орқали мурожаат қилиши мумкин: (71) 210 02 02, (71) 210 02 31.
Маълумот учун, «Ўзэкспомарказ»даги 500 ўринга мўлжалланган ушбу марказ коронавирусга чалингани гумон қилинган беморларга аниқ ташхис қўйиш ва касаллик даражасини аниқлаш, шунингдек, беморларга биринчи ёрдам кўрсатиш ва уларни клиникаларга тақсимлашга мўлжалланган. Агар зарурат туғилса, «Ўзэкспомарказ»нинг бошқа павильонлари ҳам коронавирусга чалинган беморларни даволашга мўлжалланган зонага айлантирилади.
Бу Тошкент шаҳар ҳокими Жаҳонгир Ортиқхўжаевнинг ташаббуси бўлиб, вазият жуда оғирлашганида «Б режаси» бўлиши учун амалга оширилмоқда. Марказни ташкил этиш ва таъминлаш харажатлари бюджет маблағлари ҳисобидан қопланмайди.
Изоҳ (0)