Соғлиқни сақлаш вазирлиги коронавирусга чалинган тошкентлик 60 ёшли аёлнинг вафот этганини тасдиқлади.
Аввалроқ Олмазор тумани ҳокимлиги «Мирзо Ғолиб» маҳалласида жойлашган 18-оилавий поликлиника катта ҳамшираси Феруза Асқаровна Тўхтаева коронавирус инфекцияси асоратлари оқибатида вафот этганини маълум қилган, бироқ ССВ ушбу маълумотни тасдиқламаган эди.
Соғлиқни сақлаш вазирлигининг маълум қилишича, Тошкент шаҳри Олмазор туманида яшаган 60 ёшли Ф.Т.да 8 июль куни COVID-19 тасдиқланган ва у Вирусология илмий-текшириш институти клиникасига ётқизилган.
Унга COVID-19 инфекциясининг ўта оғир кечиши, икки томонлама пневмония ташхиси қўйилган. Беморда касаллик сепсис, ўткир нафас ва юрак қон-томир етишмовчилиги, полиорган етишмовчилик каби асоратлар билан кечган. Шунингдек, у юрак ишемик касаллиги, зўриқиш стенокардия, қандли диабет каби ҳамроҳ хасталиклар билан ҳам оғриган.
Шифохонада беморнинг даволаниши давомида шифокорлар томонидан онлайн консультация ва консилиумлар қилинган, даволаш жараёни мутахассислар тавсияси асосида олиб борилган.
Бироқ шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас ва юрак қон-томир етишмовчилигидан вафот этган.
Бу ССВ статистикаси бўйича 88, «Дарё» ҳисоб-китобига кўра эса Ўзбекистондаги 90-ўлим ҳолати.
Аввалроқ Тошкентда юнусободлик 39 ёшли эркак COVID-19 асоратлари оқибатида вафот этгани тўғрисида хабар берилганди.
Мавзуга доир: Тошкентдаги тез тиббий ёрдам хизмати шифокори: Асосий ресурс асоссиз чақирувларга кетиб қолмоқда
Изоҳ (0)