Тошкентда ўзини Президент администрациясида ишловчи шахс сифатида таништириб, фирибгарлик билан шуғулланган шахс қўлга олинди. Бу ҳақда «Ўзбекистон 24» каналида хабар берилди.
Маълумотларга кўра, 2020 йилнинг март ойида Тошкент шаҳридаги хусусий клиникалардан бирининг раҳбарига номаълум кимса қўнғироқ қилиб, ўзини Президент администрациясида юқори лавозимда ишловчи шахс сифатида таништирган ва унинг қабулига бир она-болани юбораётганлигини, зудлик билан тиббий муолажа кўрсатиши кераклигини тайинлаган.
Клиника раҳбари унинг расмий оҳангдаги муомаласидан ҳеч бир шубҳага бормасдан, қабулига келган аёлнинг боласини текширувлардан ўтказади. Натижада боланинг бурнидаги ўсимтани жарроҳлик йўли билан олиб ташлаш зарурлиги аён бўлади. Гарчи бундай операция ўзининг шифохонасида амалга оширилмаса-да, у 7,5 миллион сўм сарфлаб, бошқа клиникада бу топшириқни бажаради.
Орадан бир оз муддат ўтиб, юқоридаги шахс клиника раҳбарига яна қўнғироқ қилади ва кўрсатган хизмати учун миннатдорчилик билдириб, энди унга яхшилик қилмоқчи эканлигини айтади. Яъни Тошкент шаҳридаги кўп қаватли уйларда эгасиз, деб топилган 11 та хонадон борлигини, уларнинг ҳар бирини 10 минг АҚШ долларидан жами 110 минг АҚШ долларига олиб беришини билдиради.
Унинг гапларига ишонган клиника раҳбари арзон нархда таклиф қилинган уйларни олишга рози бўлади ва фирибгар юборган одамга 10 минг АҚШ долларини дастлабки тўлов сифатида беради.
Июль ойига келиб эса, у яна қўнғироқ қилади ва гўёки шаҳар ҳокимининг 11 та хонадонга эгалик ҳуқуқини берувчи қарори чиққанлигини ва бунинг учун дастлаб 50 минг АҚШ доллари беришини, қолган қисмини эса иш тўлиқ ҳал бўлганидан кейин бериши кераклигини айтади.
ДХХ ва ИИВ ходимлари ҳамкорлигида ўтказилган тезкор тадбир давомида фирибгарнинг номидан келган унинг турмуш ўртоғи ва ҳамтовоғи хусусий клиника раҳбаридан 50 минг АҚШ долларини олаётган вақтида ашёвий далиллар билан ушланган.
Сўнгра Тошкент шаҳридаги вақтинчалик яшаш манзилида фирибгарнинг ўзи – 1983 йилда туғилган Х.Б. ҳам қўлга олинган.
Сирдарё вилоятининг Сайхунобод туманида истиқомат қилувчи, ҳеч қаерда ишламайдиган ушбу шахснинг бунга қадар ҳам шу турдаги фирибгарликларни амалга оширгани маълум бўлган. Аниқланишича, у аввал «Жанубий Корея давлатига ишлаш учун юбораман», «республикадаги олий таълим муассасаларига ўқишга киритиб қўяман», дея фуқароларни алдаб келган ва Жиноят кодексининг 168-моддаси (Фирибгарлик) билан айбланиб, тўрт маротаба судланган.
Ҳозирда мазкур ҳолат юзасидан Жиноят кодексининг тегишли моддасига асосан жиноят иши қўзғатилиб, тергов ҳаракатлари доирасида ундан жабр кўрган бошқа фуқароларни аниқлаш бўйича зарур чора-тадбирлар амалга оширилмоқда.
Аввалроқ Наманганда сохта ДХХ ходимларининг бир фуқарони қўрқитиб 150 минг доллар пулни олиб қўйгани тўғрисида хабар берилганди.
Изоҳ (0)