Қорақалпоғистонда Нукус давлат педагогика институтига кириш имтиҳонларида ёрдам беришни ваъда қилиб, 3000 АҚШ доллари олаётган декан ўринбосари қўлга олинди, деб «Дарё»га хабар беради Давлат хавфсизлиги хизмати.
Қайд этилишича, Нукус давлат педагогика институтининг факультетларидан бирида декан ўринбосари вазифасида ишловчи шахс Кегейли туманида яшовчи фуқарога ушбу олий таълим муассасасига кириш имтиҳонларида ёрдам беришни ваъда қилган. Декан ўринбосари фуқародан 3000 АҚШ доллари олаётган вақтида ДХХ Қорақалпоғистон Республикаси бошқармаси ва прокуратура ходимлари томонидан қўлга олинган.
Мазкур институтнинг яна бир ходими Беруний туманида яшовчи 4 нафар фуқаронинг ўқишга киришларида ёрдам бериш эвазига уларнинг ҳар биридан 2 минг АҚШ долларидан, жами 8 минг АҚШ доллари талаб қилиб, сўралган пул маблағини олаётган вақтида ушланди.
Ҳозирда аниқланган ҳолатлар юзасидан Жиноят кодексининг тегишли моддаларига асосан жиноят ишлари қўзғатилиб, тергов ҳаракатлари доирасида ушбу ноқонуний ишларга алоқадор бўлган шахсларни аниқлаш бўйича зарур чора-тадбирлар амалга оширилмоқда.
Мавзуга доир:
Изоҳ (0)