Монополияга қарши курашиш қўмитаси Қонун ҳужжатларини ва давлат органлари қарорларининг рақобат муҳитига таъсирини баҳолаш бошқармаси бошлиғи Санжар Абдуқодиров вафот этди. Бу ҳақда қўмита матбуот хизмати хабар берди.
«Монополияга қарши курашиш қўмитаси ўзининг етук ва тажрибали мутахассисидан айрилди… Кимгадир ака, ука, дўст ва ҳамкасб бўлган яқин қадрдонимиз биз сизни соғинамиз! Илоҳим охиратингиз обод бўлсин», — дейилади қўмита хабарида.
Санжар Абдуқодиров 1980 йилда Наманган шаҳрида туғилган. Наманган муҳандислик иқтисодиёти институти ва Президент ҳузуридаги Давлат ва жамият қурилиши Академиясини битирган. «ЎзЛиДеп» партияси аъзоси бўлган.
Узоқ йиллар давомида Қимматли қоғозлар бозори фаолиятини мувофиқлаштириш ва назорат қилиш, Давлат мулки қўмитаси ва Хусусийлаштириш, монополиядан чиқариш ва рақобатни ривожлантириш давлат қўмитасида фоалият олиб борган.
Вафотига қадар Монополияга қарши курашиш қўмитаси Қонун ҳужжатларини ва давлат органлари қарорларининг рақобат муҳитига таъсирини баҳолаш бошқармаси бошлиғи лавозимида меҳнат қилаётган эди.
Қўмита хабарида унинг ўлими сабабига ойдинлик киритилмаган.
Аввалроқ Давлат хизматлари агентлиги Навоий вилояти бошқармасининг масъул ходими Адҳамжон Деҳқонов 61 ёшида коронавирусдан вафот этгани хабар берилган эди. Соғлиқни сақлаш вазирлиги бу хабарни ҳали расман тасдиқлаганича йўқ.
15 июль куни Ўзбекистон Ички ишлар вазирлиги матбуот хизмати 13 ва 14 июль кунлари тизимнинг икки нафар ходими вафоти этганини маълум қилган. Жумладан, 13 июль, душанба куни Тошкент шаҳар ИИББ Ахборот технологиялари, алоқа ва ахборотни ҳимоялаш бўлими бошлиғи ўринбосари, майор Аълохон Шомаҳмудовнинг вафот этгани, 14 июлда эса ИИВ Миграция ва фуқароликни расмийлаштириш бош бошқармаси бўлими бошлиғи подполковник Шавкат Нафасовнинг вафоти муносабати билан таъзия эълон қилганди. ССВ орадан қарийб бир сутка вақт ўтганидан кейин ушбу хабарни тасдиқлаб, 70 ҳамда 71-ўлим сифатида ўз статистикасига қўшганди.
Изоҳ (0)