Тошкент шаҳрида 1-сонли шаҳар клиник шифохонасида 55 ёшли А.Х. исмли эркак ҳамда 59 ёшли Б.С. исмли эркак вафот этди. Бу ҳақда Соғлиқни сақлаш вазирлиги хабар қилган.
Хабарга кўра, Юнусобод туманида яшаган 55 ёшли А.Х.да 5 июль куни COVID-19 тасдиқланган ва у 1-сонли шаҳар клиник шифохонасига ётқизилган.
Шифохонада унга COVID-19 инфекциясининг ўта оғир кечиши, икки томонлама пневмония ташхиси қўйилган. Касаллик ўткир нафас етишмовчилиги, ўткир юрак-қон томир етишмовчилиги, марказий нерв системаси интоксикацияси каби асоратлар билан кечган.
Шунингдек, беморда гипертония касаллигининг 3-даражаси, артериал гипертензия каби ҳамроҳ касалликлар бўлган. Беморга мутахассислар томонидан онлайн консультация ва консилиумлар ўтказилган, даволаш жараёни белгиланган стандартлар асосида олиб борилган.
Сўнгги кунларда ҳамроҳ касалликлар фонида касаллик асоратлари ҳисобига беморнинг аҳволи кескин оғирлашган. Шифокорлар томонидан стандартлар асосида амалга оширилган реанимацион муолажаларга қарамасдан, у ўткир юрак-қон томир ва нафас етишмовчилигидан вафот этган.
Тошкент вилояти Тошкент туманида яшаган 59 ёшли Б.С.да эса 9 июль куни COVID-19 тасдиқланган ва у ҳам 1-сонли шаҳар клиник шифохонасига ётқизилган.
Тиббиёт муассасасида унга COVID-19 инфекциясининг ўта оғир кечиши, икки томонлама пневмония ташхиси қўйилган. Касаллик ўткир нафас етишмовчилиги, ўткир юрак-қон томир етишмовчилиги, диабетик нефропатия, сурункали буйрак етишмовчилиги, марказий нерв системаси интоксикацияси каби асоратлар билан кечган.
Беморда юрак ишемик касаллиги, стенокардия, коронар қон томирларни стентлашдан кейинги ҳолат (2008, 2012 йилларда), гипертония каби ҳамроҳ касалликлар бўлган.
Асосий касаллик оғир кечиши ва асоратлари ҳисобига аҳволи кескин ёмонлашиб, мутахассислар томонидан тўлиқ ҳажмда, стандарт асосида ўтказилган реанимацион чораларга қарамай, бемор ўткир юрак-қон томир ва нафас етишмовчилиги сабабли вафот этган.
17 июль куни Соғлиқни сақлаш вазирлиги тақдим этиб келаётган расмий статистикага кўра беш нафар одам COVID-19 касаллиги оқибатида вафот этди, шу тариқа Ўзбекистонда ССВ расман тасдиқлаган ўлимлар сони эса 80 тага етди.
Кун давомида ССВ Тошкент шаҳри Сергели туманида яшовчи коронавирус юқтириб олган 62 ёшли Н.А. исмли аёл ўткир юрак-қон томир ва нафас етишмовчилигидан, Юнусобод туманида яшовчи 48 ёшли Т.Ё. исмли эркак коронавирусга чалиниб, ўткир юрак-қон томир ва нафас етишмовчилигидан вафот этгани ҳақида хабарлар берган.
Шунингдек, 17 июль куни таниқли режиссёр Сарвар Каримов Twitter’даги саҳифасида ўзи ва оила аъзолари коронавирус инфекциясига чалингани, отаси COVID-19’дан вафот этганини маълум қилган.
Бундан ташқари Монополияга қарши курашиш қўмитаси Қонун ҳужжатларини ва давлат органлари қарорларининг рақобат муҳитига таъсирини баҳолаш бошқармаси бошлиғи Санжар Абдуқодировнинг вафоти ҳақида ҳам хабар берилган. Лекин қўмита ахборот хизмати берган хабарда унинг ўлими сабабига ойдинлик киритилмаган.
Эслатиб ўтамиз, 16 июль куни Тошкент шаҳар ҳокими Жаҳонгир Ортиқхўжаев пойтахтда жойлашган Ибн Сино номидаги 1-сонли шаҳар клиник шифохонасида бўлиб, ундаги шароитлар билан танишди ҳамда COVID-19 билан хасталанган фуқароларнинг оила аъзолари билан суҳбатлашгани хабар қилинганди.
Изоҳ (0)