Ўзбекистон Президенти Шавкат Мирзиёев 17 июль, жума куни бўлиб ўтган йиғилишда туманлардаги коронавирус билан боғлиқ вазият юзасидан ҳудудлар раҳбарлари қарор қабул қилиши, шунингдек, соғлиқни сақлаш тизимига тиббиёт коллежлари битирувчиларини ишга жалб қилиш ҳақида гапирди.
«Менинг туманимда коронавирус йўқ, деган туман ҳокимлари хато қилади», — деди давлат раҳбари.
Президентнинг айтишича, ҳар бир туман ва шаҳар ҳокимларига ўз ҳудудидаги вазиятдан келиб чиқиб, вилоят ҳокими билан маслаҳатлашган ҳолда карантин чекловларини кучайтириш ёки юмшатиш бўйича қарор қабул қилиш имконияти берилди.
Шунингдек, Шавкат Мирзиёев Тошкент шаҳри ва вилоятидаги ҳолатга яна бир бор тўхталиб ўтди ва мазкур ҳудудлар раҳбарларининг вазиятни яхши билмаслигини таъкидлади.
«Бу рақамлар барчамизни ларзага солиши керак. 3 минг — 4 мингта эди, 15 мингтага чиқди. Тошкент шаҳри намуна бўлса бўлар эди. Шунча имконият, тиббий, илмий салоҳият катта бу ерда», — деди Президент.
Президент мамлакатнинг барча ҳудудларида тиббиёт коллежлари мавжудлигини таъкидлаб, мазкур муассасаларни тамомлаган ҳамшираларнинг ёрдамидан фойдаланиш кераклигини айтди.
«Ҳамма вилоятларда тиббиёт коллежлари бор. Уларда мутахассислар бор, ҳамшираликка аъло ўқиган талабалар бор. Тугатганлар бор. Ҳар бир туман раҳбари мурожаат қилса, узоқ-узоқ қишлоқларда 50-100 нафар шундай ҳамширани топса бўлади. Минг афсус, ўзимиз қилмаяпмиз буни», — деди Шавкат Мирзиёев.
Бундан ташқари, давлат раҳбари хорижда юрган ва Ўзбекистонга қайтиш истагида бўлган барча фуқаролар олиб келинишини таъкидлади.
Давлат раҳбари ҳар уч соатда туманлардаги ва шифохоналардаги вазият ҳақида хабар берувчи алоҳида ахборот тизимини яратиш бўйича топшириқ берди. Шунингдек, Тошкент шаҳри ва Тошкент вилояти бўйича алоҳида дастур яратиш юзасидан кўрсатма берилди.
Эслатиб ўтамиз, Шавкат Мирзиёев мазкур йиғилишда коронавирусга қарши чоралар нима сабабдан яхши натижа бермаётганини маълум қилди, шунингдек, коронавирусни енгиш шарти ҳақида гапирди.
Изоҳ (0)