Навоий ИЭСга қарашли сув ўтқазиш тўғони олдида жойлашган сув ўтқазиш жойининг оқиб ўтувчи Зарафшон дарёси қисмидан 15 июль куни, тахминан, соат 10:30 лар атрофида 40-45 ёшлардаги номаълум эркакнинг мурдаси топилгани хабар қилинганди. Бош прокуратура ахборот хизмати жиноят иши бўйича қўшимча маълумотларни тақдим этди.
Дастлабки тергов давомида тўпланган далилларга кўра, 26 ёшли З.Ж. исмли аёл, онаси Ф.Ж., 20 ёшли қариндоши Ш.Д. (эркак) билан 45 ёшли В.Д. ўртасида келиб чиққан келишмовчилик оқибатида унинг бош соҳасига ва танасининг турли қисмларига қўл ва оёқлари ҳамда темир, ёғоч бўлаклари билан уриб, тан жароҳатлари етказган.
2020 йилнинг 12 июль куни, тахминан, соат 12:30 ларда В.Д. уларнинг айтган ишларини бажармасдан, Ф.Ж., З.Ж.ни ҳақорат қилишда давом этиб тинчланмаган. Оқибатда Ш.Д. ва З.Ж. В.Д.ни қасддан ўлдиришга қарор қилган. Ш.Д. В.Д.нинг чап қўлидан, З.Ж. эса ўнг қўлидан ушлаган ҳолатда З.Ж. ўнг оёғи билан В.Д.нинг бўйин соҳасидан босиб, уни бўғиб ўлдирган.
Шундан сўнг гумонланувчилар содир қилинган ўта оғир жиноятни яшириш ва келгусида фош қилинишининг олдини олиш мақсадида В.Д.нинг жасадини катта ҳажмдаги матодан ишланган қанорга ўраб, эшак аравага ортиб, Зарафшон дарёсига оқизиб юборган.
2020 йил 15 июль куни соат 11:00 ларда Кармана туманидаги Навоий иссиқлик электр станциясининг тўғонидан оқиб ўтувчи Зарафшон дарёсининг ирмоғидан В.Д.нинг жасади бош пешона соҳаси ўнг томонида иккита жароҳатлар ва ўнг томондан 3, 4-қовурғалар, чап томондан 6, 7, 8, 9-қовурғалар ўрта ўмров соҳасидан синиши ва бошқа тан жароҳатлари билан топилган.
Мазкур ҳолат юзасидан вилоят прокуратураси томонидан З.Ж. ва Ш.Д.га нисбатан Жиноят кодексининг 97-моддаси 2-қисми «п» банди (Бир гуруҳ шахслар ёки уюшган гуруҳ аъзоси томонидан ёхуд ўша гуруҳ манфаатларини кўзлаган ҳолда қасддан одам ўлдириш) билан жиноят иши қўзғатилган. Ш.Д. ва З.Ж.га ҳимоячи иштирокида ҳуқуқлари видеоёзув орқали тушунтирилиб, иш бўйича гумон қилинувчи тариқасида иштирок этишга жалб этилиб, Жиноят процессуал кодексининг 221-моддаси тартибида ушланган. Дастлабки тергов ҳаракатлари олиб борилмоқда.
Аввал Бухорода ёш йигит 65 ёшли отахон билан жанжалда уни арматура билан уриб ўлдириб қўйгани, Тошкентда 17 ёшли сартарош бир йигитни қайчи билан ўлдириб қўйгани, Андижонда теракларнинг сояси бир кишининг ўлимига сабаб бўлгани ҳақида хабарлар берилган.
Изоҳ (0)