Фарғонада тез ёрдам бўлими ходимаси ва ИИБ ходимлари билан жанжаллашган икки аёл 10 суткага қамалди, яна бири жаримага тортилди

Бош прокуратура ахборот хизмати Фарғона вилояти Қува туманидаги тез тиббий ёрдам бўлимида юзага келган жанжалнинг тафсилотлари ҳақида «Дарё»га маълум қилди.

Хабарда қайд этилишича, воқеа Қува туман прокуратураси томонидан ўрганилган. 10 июль соат 21:20 ларда Қува тумани, «Гўзал» маҳалласида яшовчи У.Ж. туман тез тиббий ёрдам бўлимига қўнғироқ қилган ва ногирон ўғлининг соғлиғида ўзгаришлар бўлганини айтган.

Аммо У.Ж.нинг мурожаати бўлим ходимаси Н.З. навбатчи шифокорлар бошқа хонадонда тиббий кўрикда эканлиги, ушбу хонадондан чиққандан сўнг зудлик билан У.Ж.нинг хонадонига бориши мумкинлигини билдирган.

Шундан сўнг У.Ж. бўлимнинг телефон рақами банд бўлганлиги сабабли автомашина келишини кутмасдан, карантин қоидаларини бузган ҳолда, 2 нафар таниши билан тиббий ниқобсиз С.З. ва Й.З. билан бирга келган. У бу ерда қабулхона ойналарини синдириб, чақирувларни қабул қилиш ходимаси Н.З. билан оғзаки жанжаллашган.

У.Ж. ва унинг танишлари бўлимга келган ИИБ ходимларининг талабларига бўйсунмасдан, майда безорилик ҳаракатларини давом эттирган. Якунда Қува тумани ИИБ томонидан мазкур ҳолатлар юзасидан тегишли ҳужжатлар Қувасой шаҳар маъмурий судига юборилган.

Қувасой шаҳар маъмурий судининг 2020 йил 17 июлдаги қарорига кўра, У.Ж.га Маъмурий жавобгарлик тўғрисидаги кодекснинг 54-моддаси 1-қисми, 61 (2)-моддаси 1-қисми 183,194-моддалари, Й.З. ва С.З. 54-модда 1-қисми, 183,194-моддаларида кўрсатилган ҳуқуқбузарликларни содир этган деб топилиб, Й.З. ва С.З.га 10 сутка маъмурий қамоқ, У.Ж.га нисбатан эса мазкур кодекснинг 29-моддаси қўлланиб, базавий ҳисоблаш миқдорининг 5 баравари миқдорида жарима жазоси тайинланган.

Шунингдек, тезкор тиббий ёрдам бўлими чақирувларини қабул қилиш ходими Н.З.га Маъмурий жавобгарлик тўғрисидаги кодекснинг 41-моддаси, 54-моддаси 1-қисмида кўрсатилган ҳуқуқбузарликни содир этган деб топилиб, базавий ҳисоблаш миқдорининг 5 баравари миқдорида жарима жазоси тайинланган.

Аввал Самарқанд шаҳрида 3 июль, жума куни 26 ёшли фуқаро Самарқанд вилоят кўп тармоқли тиббиёт марказининг қоровули ва шифокорини ургани учун унга нисбатан жиноят иши очилгани, Бухорода поликлиника ҳамшираси СЭОМ ходими томонидан калтаклангани, 21 ёшли жувоннинг ҳомиласи тушган бўлиши мумкинлиги ҳақида хабарлар берилган.