Navoiy IESga qarashli suv o‘tqazish to‘g‘oni oldida joylashgan suv o‘tqazish joyining oqib o‘tuvchi Zarafshon daryosi qismidan 15-iyul kuni, taxminan, soat 10:30 lar atrofida 40-45 yoshlardagi noma’lum erkakning murdasi topilgani xabar qilingandi. Bosh prokuratura axborot xizmati jinoyat ishi bo‘yicha qo‘shimcha ma’lumotlarni taqdim etdi.
Dastlabki tergov davomida to‘plangan dalillarga ko‘ra, 26 yoshli Z.J. ismli ayol, onasi F.J., 20 yoshli qarindoshi Sh.D. (erkak) bilan 45 yoshli V.D. o‘rtasida kelib chiqqan kelishmovchilik oqibatida uning bosh sohasiga va tanasining turli qismlariga qo‘l va oyoqlari hamda temir, yog‘och bo‘laklari bilan urib, tan jarohatlari yetkazgan.
2020-yilning 12-iyul kuni, taxminan, soat 12:30 larda V.D. ularning aytgan ishlarini bajarmasdan, F.J., Z.J.ni haqorat qilishda davom etib tinchlanmagan. Oqibatda Sh.D. va Z.J. V.D.ni qasddan o‘ldirishga qaror qilgan. Sh.D. V.D.ning chap qo‘lidan, Z.J. esa o‘ng qo‘lidan ushlagan holatda Z.J. o‘ng oyog‘i bilan V.D.ning bo‘yin sohasidan bosib, uni bo‘g‘ib o‘ldirgan.
Shundan so‘ng gumonlanuvchilar sodir qilingan o‘ta og‘ir jinoyatni yashirish va kelgusida fosh qilinishining oldini olish maqsadida V.D.ning jasadini katta hajmdagi matodan ishlangan qanorga o‘rab, eshak aravaga ortib, Zarafshon daryosiga oqizib yuborgan.
2020-yil 15-iyul kuni soat 11:00 larda Karmana tumanidagi Navoiy issiqlik elektr stansiyasining to‘g‘onidan oqib o‘tuvchi Zarafshon daryosining irmog‘idan V.D.ning jasadi bosh peshona sohasi o‘ng tomonida ikkita jarohatlar va o‘ng tomondan 3, 4-qovurg‘alar, chap tomondan 6, 7, 8, 9-qovurg‘alar o‘rta o‘mrov sohasidan sinishi va boshqa tan jarohatlari bilan topilgan.
Mazkur holat yuzasidan viloyat prokuraturasi tomonidan Z.J. va Sh.D.ga nisbatan Jinoyat kodeksining 97-moddasi 2-qismi “p” bandi (Bir guruh shaxslar yoki uyushgan guruh a’zosi tomonidan yoxud o‘sha guruh manfaatlarini ko‘zlagan holda qasddan odam o‘ldirish) bilan jinoyat ishi qo‘zg‘atilgan. Sh.D. va Z.J.ga himoyachi ishtirokida huquqlari videoyozuv orqali tushuntirilib, ish bo‘yicha gumon qilinuvchi tariqasida ishtirok etishga jalb etilib, Jinoyat protsessual kodeksining 221-moddasi tartibida ushlangan. Dastlabki tergov harakatlari olib borilmoqda.
Avval Buxoroda yosh yigit 65 yoshli otaxon bilan janjalda uni armatura bilan urib o‘ldirib qo‘ygani, Toshkentda 17 yoshli sartarosh bir yigitni qaychi bilan o‘ldirib qo‘ygani, Andijonda teraklarning soyasi bir kishining o‘limiga sabab bo‘lgani haqida xabarlar berilgan.
Izoh (0)