Немис автоконцерни ўзининг энг кучли серияли суперкари — Mercedes-AMG GT Black Series’ни тақдим этди, деб хабар беради The Drive. Янги модель капоти остидан 730 от кучига эга V8 двигатели ўрин олган бўлиб, машинанинг 100 км/соат тезликка эришиши учун 3,2 сония кифоя.
Black Series серияси ўзининг двигателлари тавсифи билан кўпчиликни ҳайратга солиб келган Mercedes-AMG’нинг афсонавий автомобиллар линейкаси ҳисобланади.
Black Series купеси ташқи кўриниши билан «стандарт» AMG GT’дан радиатор панжараларининг катталиги, аэродинамик тўсгичлари, юкхона томидаги массив антиқаноти, экстерьери ва интерьеридаги қора акцентлар билан фарқ қилади.
Янги AMG’ни 730 от кучи ва 800 Нм айланувчи моментга эга 4,0 литрли V8 твин-турбодвигатели ҳаракатга келтиради. Двигатель етти поғонали «робот» узатмалар қутиси ёрдамида бошқарилади. У 200 метр масофани тўққиз сонияда босиб ўтади, максимал тезлиги соатига 325 километрга тенг.
Купенинг аэродинамик тавсифини яхшилаш учун GT3 ва GT4 пойга сериаларига тегишли қўшимча ҳаво ҳайдагич ва қирқимлар ўрнатилган. Шунингдек, олд бампер остидан созланувчи сплиттер ўрин олган бўлиб, у автомобиль остида паст босим зонасини ҳосил қилади.
Ҳозирча AMG GT Black Series нархи ва тиражи ҳақида маълумотлар мавжуд эмас.
Аввалроқ Maybach услубида яратилган Mercedes GLE тақдим этилгани тўғрисида хабар берилганди.
Изоҳ (0)