Берилмаётган ойлик ва ҳимоя воситалари, коронавирусга чалинган фельдшерга эркин юришга рухсат. Тиббиёт ходимларининг ўзаро суҳбати видеоси тарқалди

Ижтимоий тармоқларда шифокорларнинг ўзаро суҳбати акс этган видео тарқалди.

Тасвирда шифокорлар ойликларини беришмаётганидан ва коронавирусга чалинган фельдшернинг шифохона бўйлаб бемалол ҳаракатланишига туман ССБ рухсат бериб қўйгани айтилган.

Шифокорларнинг бири 20 кунлик иш ҳақини ололмаётгани. Раҳбарлар сансалорликка солиб, турли баҳоналар билан унга пулини бермаётганини гапирган. Унинг айтишича, раҳбарлар 4,5-5 миллион сўм беришни ваъда қилган.

«Мен улардан қарз сўрамаяпман, ўзим ишлаган пулимни сўраяпман», — дейди у.

Шифокор махсус комбинезонларнинг дезинфекция қилинишини ҳам танқид қилган. Унинг таъкидлашича, оддий сув билан «пис-пис» қилингани билан вирус йўқ бўлмаслигини айтган. Шунингдек, улар шу тарзда вирус ташувчи бўлиб қолаётганини айтган.

Яна бир ходим эса юқоридаги тарзда дезинфекция қилинган махсус кийимларни кийишга рози бўлмаганини айтган. Шунингдек, у биринчи шифокорнинг ойлигини ололмаётганига нисбатан «Давлат берган ‘форма’сини бермаяпти-ю, сани ишлаган пулингни берадими?» тарзда жавоб қайтарган.

Буларни эшитаётган яна бир ходим буларнинг барчаси ўйин эканлигини иддао қилган.

Шифокорлар суҳбатида коронавирусга чалинган Даврон исмли тиббий фельдшер бемалол ниқобсиз шифохонада юргани, унга туман ССБ рухсат бергани айтилган.

Суҳбат айнан қаерда ва қайси туманга қарашли тиббиёт ходимлари ўртасида бўлгани номаълум.