Тошкент шаҳар ҳокимлиги матбуот котиби Фурқат Маҳмудхўжаев пойтахт тиббиёт муассасаларига 103 рақами орқали тез ёрдамга мурожаат қилишда бандлик бўлмаслиги чоралари кўрилаётганини билдирди. Бу ҳақда у АОКА ҳузуридаги штабда ташкил этилган брифингда маълум қилган.
Жумладан, қўнғироқлар интенсивлиги ўрганилганда 103 рақамига соат 18:00 дан соат 00:00 гача энг кўп мурожаатлар бўлиши аниқланган. Шу муносабат билан иш режими қайта кўриб чиқилиб, айни вақт оралиғида энг тажрибали операторлар ишлашлари учун танлаб олинган. Яхши ишлаган операторларни рағбатлантириш тизими йўлга қўйилган.«Тез ёрдам бригадаси 15 дақиқадан кўп бўлмаган вақтда етиб бориши чоралари кўрилди. Яхши ишлаган бригадалар учун ҳам рағбатлантириш тизими қўлланилади», — дейди Маҳмудхўжаев.
Мавзуга доир: Тошкент шаҳар ҳокимлиги коронавирусга қарши кураш учун ўпкани сунъий нафас олдириш аппаратлари ва Damas автомобиллари сотиб олди
Эслатиб ўтамиз, 15 июль куни Президент Шавкат Мирзиёев иштирокида видеоселектор бўлиб ўтди. Селектор давомида коронавирус тарқалишининг олдини олиш ва даволаш бўйича Тошкент шаҳридаги ишларни талаб даражасида ташкил этмагани, эпидемиологик вазиятнинг салбий ўзгаришларига тайёр бўлишни таъминламагани, бу касаллик билан «пастга тушиб» мукаммал шуғулланмагани учун Тошкент шаҳри ҳокими Жаҳонгир Ортиқхўжаев ва соғлиқни сақлаш вазири Алишер Шодмоновга ҳайфсан эълон қилинган.
Изоҳ (0)