Тошкент шаҳар Юнусобод туманида яшовчи 48 ёшли эркак коронавирусга чалиниб, ўткир юрак-қон томир ва нафас етишмовчилигидан вафот этди. Бу ҳақда Соғлиқни сақлаш вазирлиги хабар берди.
Хабарда қайд этилишича, Юнусобод туманида яшаган 48 ёшли фуқаро Т.Ё. тана ҳароратининг кўтарилиши сабабли намуна топширган. 29 июнь куни унда COVID-19 аниқланган ва йўтал, ҳансираш белгилари кучайганлиги сабабли Вирусология илмий-текшириш институти клиникаси реанимация бўлимига ётқизилган.
Унга миокард инфаркти, COVID-19 инфекцияси ўта оғир кечиши, икки томонлама пневмония ташхиси қўйилган. Касаллик ўнг ўпка спонтан пневмоторакси, нафас етишмовчилиги, ўткир юрак қон-томир етишмовчилиги асоратлари билан кечган.
Текширувлар беморда аввалдан бронхиал астма касаллиги мавжуд бўлганини кўрсатган. Мутахассислар томонидан онлайн консултация ва консилиумлар ўтказилган, даволаш жараёни белгиланган стандартлар асосида олиб борилган.
Сўнгги кунларда шифокорлар томонидан стандартлар асосида амалга оширилган реанимацион муолажаларга қарамасдан, бемор ўткир миокард инфаркти, ўткир нафас ва юрак қон-томир етишмовчилигидан вафот этган.
Юнусободлик бемор Ўзбекистонда COVID-19 инфекцияси асоратлари оқибатида вафот этган 77-қурбонга айланди.
Аввалроқ Сирдарё вилояти мусиқали драма театри актёри Ўзбекистонда хизмат кўрсатган артист Адҳам Абдуллаевнинг 67 ёшида вафот этгани, у Ўзбекистонда коронавирус асоратлари оқибатида ҳаётдан кўз юмган 76-бемор бўлгани тўғрисида хабар берилганди.
16 июль куни Тошкент шаҳрининг Юнусобод туманида 55 ёшли Ш.А. исмли эркак, Сергели тумани ИИО ФМБ подполковниги Абдулазиз Тошев, Тошкент шаҳри Чилонзор туманида яшовчи 53 ёшли Ш.А. исмли эркакнинг вафот этгани ҳақида хабарлар берилган.
Изоҳ (0)