Фарғонада спиртли ичимликлар дўконига 100 АҚШ доллари миқдоридаги қалбаки купюрани ўтказиб, 200 минг сўмлик алкогол маҳсулотини олган 21 ёшли А.Х., 23 ёшли О.М. ва 20 ёшли Ш.П. қўлга олинди. Бу ҳақда Тергов департаменти хабар берган.
Қайд этилишича, 2020 йил 8 июль куни соат 19:00да Данғара шаҳарчасида 63 ёшли Ғ.У.га тегишли бўлган спиртли ичимликлар савдо дўконида 21 ёшли А.Х., 23 ёшли О.М. ва 20 ёшли Ш.П. қалбаки пул билан боғлиқ можарога аралашиб қолган.
А.Х. ёнида бўлган 1 дона 100 АҚШ доллари купюрасини бериб, мазкур купюра эвазига 200 минг сўмлик алкогол маҳсулот сотиб олишини, қолган қисмини сотувчи сўм валютасида қайтариб беришини айтган. Дўкон сотувчиси Ғ.У. 100 АҚШ доллари купюрани сохта эканлигига шубҳа қилиб, бу ҳақда туман ИИБга мурожаат қилган.
Терговга қадар текширув давомида дўкон сотувчиси Ғ.У.дан 1 дона 100 АҚШ доллари купюраси текшириб кўриш учун ашёвий далил сифатида олинган. Экспертиза хулосасига кўра, 100 АҚШ доллари купюраси қалбаки эканлиги аниқланган.
Ҳолат юзасидан Данғара тумани ИИБ ҳузуридаги Тергов бўлими томонидан Жиноят кодексининг 176-моддаси 1-қисми билан жиноят иши қўзғатилган (Қалбаки пул, акциз маркаси ёки қимматли қоғозлар ясаш, уларни ўтказиш). Ҳозирда жиноят иши бўйича дастлабки тергов ҳаракатлари ўтказилмоқда.
Аввал «Қамчиқ» довонининг бошланиш қисмида жойлашган Тошкент вилояти ИИББ ЙҲХБга қарашли «Чинор» мунтазам йўл патруль хизмати постида қалбаки долларлар олиб кетаётган шахслар ушлангани, Тошкент халқаро аэропортида 60 минг АҚШ доллари миқдоридаги қалбаки пулни олиб кирмоқчи бўлган шахс қўлга олингани, Наманган вилояти Учқўрғон туманида қалбаки 100 АҚШ долларини муомалага киритган фуқарога нисбатан Жиноят кодексининг 176-моддаси 2-қисми «а» банди билан жиноят иши қўзғатилгани ҳақида хабарлар берилган.
Изоҳ (0)