Коронавирус бўйича Call-марказ ходими иш ҳақи олмасдан ишлаётгани ва мурожаатларга хизмат кўрсатиш яхши эмаслигини айтди

Ўзбекистонда коронавирус бўйича саволларга 1003 рақами орқали жавоб берадиган Call-марказ ходими «Troll.uz» каналига марказдаги вазият, иш шароитлари ва келиб тушаётган мурожаатларга хизмат кўрсатиш ҳолати ҳақида гапириб берди.

Ходимнинг маълум қилишича, мазкур Call-марказда ишлайдиган ходимлар иш ҳақи олмайди. Кўпчиликдан қуйидаги расмда кўрсатилган билдиришномага қўл қўйдириб олинган. «Бўлмаса, асосий иш жойимиздан айриламиз. Кўнгилли бўлиб ишлаётганлар ҳам бор», — дейди у.

Марказ ходимининг айтишича, фуқаролар 103 рақамига қўнғироқ қилса, 1003 рақамига тушади, марказ ходимлари эса сўровни 103 рақамига юборади, лекин кўп ҳолларда тез ёрдам сўров тушган жойга бормайди.

«Бизга СЕОМ, поликлиника бош шифокорлари, ҳокимият телефон рақамлари берилган, лекин ҳеч қайсиси жавоб бермайди. 1003 нинг ўзида ҳеч қандай ваколат йўқ. Биз шунчаки қўнғироқлар орқали келган сўровларни йўналтирадиган хизматмиз» , — дея таъкидлайди ходим.

Унинг сўзларига кўра, ҳар бир тушган сўровга 15 кун ичида хизмат кўрсатиш керак. «Лекин 15 кунда касалланган инсон билан нималар бўлмайди?», — дея савол қўйган марказ кўнгиллиси. Унинг қўшимча қилишича, 10 июлда тушган сўровларга ҳали ҳам хизмат кўрсатилмаган. Марказ тизимида хизмат кўрсатилмаган сўровлар кўриниб туради.

Шунингдек, поликникалардагилар беморларга шунчаки маслаҳат бермоқда. «Бу маслаҳат нимани ҳал қилади? Буни ўзимиз ҳам беришимиз мумкин. Амалий ёрдам беришмаяпти», — деб таъкидлайди ходим.

Овқатланишга вақт ажратилмаган. Кўчада овқатланамиз ёки уйдан олиб келамиз. Тушликни соат 17:00—19:00 да қиламиз. Кечаси соат 00:00—01:00 да эса кечки овқат.

Оиламизда кўп одам бор. Уларга вирус юқтирмоқчи эмаслигим туфайли тез ёрдамдан Call-марказга ўтдим. Тез ёрдамдаги кўп ходимлар вирусни юқтириб олди.

Штаб бўшаяпти. Баъзилар ишлашдан бош тортмоқда. Шунинг учун магистр ва ординаторларни жалб қилишяпти.

Тез ёрдамда ишлаганимда шахсан ўзим вирусдан кунига 3-4 кишининг ўлимининг гувоҳи бўлганман. Янгиликларда буни кўрсатишмаяпти. Аниқ статистика йўқ. Расмий статистикага кўпчилик ишонмаяпти.

Бош прокурорнинг 15 дақиқада тез ёрдам етиб келади деган гаплари фақат Президент учун айтилган. Машина ва ходимларнинг ўзи йўқ бўлса, бир кунда 600 талаб сўров тушса, қаердан етиб келади? Прокуратура ишонч телефонлари ҳам ишламайди. 1007 га телефон қилиб кўринг, ишонмасангиз. Қанча беморлар шикоят қилишяпти.

Call-марказ ходими

Президент Шавкат Мирзиёев 15 июль куни Тошкент шаҳри ва Тошкент вилоятида пандемия билан боғлиқ вазият муҳокамасига бағишланган видеоселектор йиғилишида Call-марказларнинг алоқа воситалари ва операторлари сонини камида икки баробарга ошириш бўйича топшириқ берилди.

Шунингдек, йиғилишда Тошкентда охирги 3 кунда тез ёрдамнинг вақтида етиб бормагани сабабли 43 киши турли касалликлар билан вафот этгани маълум қилинди.

Шундан сўнг Ўзбекистонда фуқароларнинг COVID-19 ҳақидаги саволларига жавоб берадиган Call-марказлар фаолият бошлади.