Ўзбекистон БМТнинг Электрон ҳукуматни ривожлантириш даражаси рейтингида 87-ўринни эгаллади

Электрон ҳукуматнинг ривожланиш даражаси бўйича БМТнинг янги сўровида Ўзбекистон 193 давлат орасида 87-ўринни эгаллади. Бу ҳақда «Gazeta.uz» хабар берди.

Қайд этилишича, инфратузилманинг чекланган ривожланишига қарамай, Ўзбекистонда онлайн хизматлар кўрсатиш сезиларли яхшиланган.

Ўзбекистоннинг электрон ҳукуматни ривожлантириш индекси (EHRI) 0,66 ни (2018 йилда — 0,62) ташкил этди, бу дунё бўйича ўртача кўрсаткичдан юқоридир.

Дания 0,97 индекс билан рейтингда етакчи бўлди. Жанубий Корея 0,95 индекс билан Осиё минтақасида биринчи бўлди. Қозоғистон эса ўз электрон ҳукумати билан Марказий Осиёда пешқадам деб топилди. Мамлакатнинг рейтингда қайд этилган индекси — 0,83 ни ташкил қилди. 2018 йилда бу кўрсаткич 0,75 ни ташкил қилган эди.

Собиқ иттифоқ давлатлари рейтингда қуйидагича ўрин эгаллаган. Қозоғистон 29-ўринда, Россия – 36, Беларусь – 40, Грузия – 65, Арманистон – 68, Украина – 69, Озарбайжон – 70, Молдова – 79, Қирғизистон – 83, Ўзбекистон – 87, Тожикистон – 133, Туркманистон эса 158-ўринда қайд этилган.

EHRI учта кичик индексдан иборат: телекоммуникация инфратузилмаси индекси, инсон капитали индекси ва онлайн хизматлар индекси. Ўзбекистонда улар мос равишда 0,47; 0,74 ва 0,78 ни ташкил этди.

Иккинчи асосий кўрсаткичи — Электрон иштирок этиш индекси бўйича Ўзбекистон рейтингда 13-ўринга юқорилаб 46-ўринни эгаллади. Бу рўйхатда 0,80 индексига эга бўлган Ўзбекистон, Электрон иштирок этиш даражаси юқори бўлган давлатлар гуруҳига кирди.

Электрон ҳукуматнинг ривожланиш даражаси рейтинги Бирлашган Миллатлар Ташкилотининг Иқтисодий ва ижтимоий ишлар департаменти томонидан ҳар икки йилда бир марта эълон қилинади. Бу БМТга аъзо барча давлатларнинг электрон ҳукуматининг ривожланиш даражасини баҳолайдиган ягона глобал ҳисобот.

Электрон ҳукуматни ривожлантиришда мамлакатлар дуч келадиган муаммолар сифатида чекланган ресурслар, рақамли инфратузилма ва имкониятлар етарли эмаслиги кўрсатилади.