Ўзбекистон аҳолиси ўтган ярим йил ичида банкларга 2,2 млрд доллар сотди, 1,7 млрд доллар эса — сотиб олди

2020 йили январь—июнь ойларида жисмоний шахслар томонидан жами миқдори 3,901 миллиард АҚШ долларига тенг чет эл валютаси билан боғлиқ операциялар (сотиш ва сотиб олиш) амалга оширилган. Бу ҳақда Марказий банк ахборот хизмати хабар берди.

Маълум қилинишича, ҳисобот даврида жисмоний шахслар томонидан сотилган чет эл валютаси миқдори 2,2 миллиард АҚШ долларини ташкил этиб, аввалги йилнинг мос даврига нисбатан 57 фоизга ёки 797 миллион долларга ошди (2019 йили — 1,399 миллиард доллар). Фақатгина апрель ойида чет эл валютасини сотиш ҳажми сезиларли даража тушиб кетганини (172 миллион доллар) кўриш мумкин.

Шу билан бирга, жисмоний шахслар томонидан сотиб олинган валюта ҳажми эса 1,7 миллиард долларга тенг бўлиб, ушбу кўрсаткич ўтган йилнинг мос даврига нисбатан 3 баробар ошди (2019 йилнинг мос даврида — 557 миллион доллар).

Таъкидланишича, натижада ушбу операциялар бўйича ижобий салдо 491 миллион долларга етиб, ўтган йилнинг мос даврига нисбатан 351 миллион долларга (ёки 42 фоизга) камайди.

Аввалроқ Ўзбекистон Марказий банки 2020 йилнинг биринчи ярмида хориждан жами 2,4 миллиард долларлик пул жўнатмалари юборилганини маълум қилганди.