Вазирлар Маҳкамаси ҳузуридаги Агросаноат мажмуаси устидан назорат қилиш инспекциясининг Асака туман бўлими бошлиғи 10 минг доллар пора билан қўлга тушган. Бу ҳақда Бош прокуратура ҳузурида Иқтисодий жиноятларга қарши кураш департаменти бўлим бошлиғи Фарҳод Очилов АОКА ҳузуридаги штабда бўлиб ўтган брифингда маълум қилди.
Аниқланишича, бўлим бошлиғи тумандаги фермер хўжалигига тегишли 44 гектар ерда қишлоқ хўжалиги маҳсулотлари тўлиқ экилмаганлигини рўкач қилиб, ер майдонини бошқага олиб бериш билан қўрқитиб, хўжалик раҳбаридан тамагирлик билан 10 минг доллар пора олган вақтида ушланган. Ҳозирда у тергов олдида жавоб бераётгани айтилди.
Шунингдек, департамент томонидан хўжалик ерларини коррупцион жиноятлар орқали сотиш, захира учун ажратилган маблағларни талон-торож қилиш ва бошқа ҳолатлар билан боғлиқ 87 та жиноят фош этилган. Очилов нархларни манипуляция қилиш, озиқ-овқат хавфсизлигини таъминлаш тизимига путур етказувчи жиноятларга қарши муросасиз курашиш олиб борилаётганини таъкидлади. Ҳозиргача ўтказилган тадбирларда қарийб 6 миллиард сўмлик озиқ-овқат маҳсулотларнинг қиммат сотилишининг олди олинган.
Эслатиб ўтамиз, аввалроқ Тошкент шаҳар ИИББ Жиноят қидирув бўлими иқтисодий хавфсизлик ва коррупцияга қарши кураш бўлинмаси ҳамда департамент ўтказган тезкор тадбирда «Эски жўва» АЖ бўлим мутахассиси У.Й 500 АҚШ доллари олаётган вақтида, Андижон вилояти Марҳамат туманида деҳқон бозори ҳудудидан қишлоқ хўжалиги маҳсулотлари учун савдо растаси ажратиб беришни ваъда қилиб 2 миллион сўмни фирибгарлик йўли билан олган вақтида ашёвий далил билан ушланган эди.
Мавзуга доир:
Изоҳ (0)