Хоразмда Tico рулига занжир билан боғланган ҳолда топилган ҳайдовчи ўз жонига қасд қилгани маълум қилинди

Июнь ойининг бошларида Хоразм вилоятида Тупроққалъа туманидаги каналдан олиб чиқилган Tico’дан 34 ёшли йигитнинг мурдаси топилгани тўғрисида хабар берилганди. Хоразм вилояти прокуратурасининг руҳий-асаб касалликлари диспансери экспертларига таяниб «Дарё»га маълум қилишича, сўнгги йилларда марҳум Т.Қ.нинг руҳиятида ўзгаришлар бўлган, унда ўзини ўлдиришга мойиллик сезилган.

Аниқланишича, Ҳазорасп тумани «Темирчи маскани» маҳалласида яшовчи 34 ёшли Т.Қ. 27 март куни, тахминан, соат 10:00 ларда отаси А.Қ. номида бўлган қизил рангли Tico автомашинасида уйидан чиқиб кетиб, бедарак йўқолган.

Мазкур жиноят иши бўйича олиб борилган тергов-тезкор ҳаракатлари давомида тўпланган далилларга кўра, Т.Қ. 27 март куни бир неча маротаба Тошсақа каналининг «Чап қирғоқ» сув тақсимлаш иншооти атрофида бўлганлиги аниқланди. Тергов давомида суд-психиатрия экспертиза тайинланиб, вилоят руҳий-асаб касалликлари диспансери экспертларининг 13 майдаги хулосасида сўнгги йилларда Т.Қ.нинг руҳиятида ўзгаришлар бўлганлиги, унда ўзини ўлдиришга мойиллик сезилаётганлиги кўрсатилган.

Шу сабабли, Т.Қ. мазкур каналнинг «Чап қирғоқ» сув тақсимлаш иншооти атрофида сувга чўкиб вафот этган бўлиши мумкинлиги инобатга олиниб, 4 июнь куни «Чап қирғоқ» сув тақсимлаш иншооти ҳудудида сув тўсилган ва қутқарув хизмати ходимларидан иборат гуруҳ томонидан каналда қидирув ишлари олиб борилган.

Натижада каналдаги сувдан Tico ва автомашинанинг ҳайдовчи ўриндиғида фуқаро Т.Қ.бўйнидан занжир билан автомашинанинг руль қисмига қулфланган ҳолдаги мурдаси топилган.

Tico русумли автомашина кўздан кечирилганда, ичкаридан қулфланганлиги, автомашина ўт олдиргичи ёниқ ҳолатда, узаткичи ҳаракатланиш ҳолатида бўлган ва автомашина салонидан янги сотиб олинган 2 та қулфларнинг нархи туширилган қути борлиги аниқланиб, ашёвий далил тариқасида олинган.

Мазкур ҳолатлар бўйича олиб борилган тергов ҳаракатлари давомида Т.Қ. юқоридаги қулфларни ва занжирларни 27 март куни Ҳазорасп тумани Янгибозор қишлоғи ҳудудидаги савдо шохобчаси сотувчисидан сотиб олганлиги аниқланган.

Т.Қ.нинг ўлим сабабини аниқлаш бўйича суд-тиббий экспертизаси тайинланиб, экспертларнинг 20 июндаги 24-сонли хулосасида Т.Қ.нинг баданида жароҳат излари йўқлиги, унинг ўлимига чўкиш оқибатида нафас йўлларининг сув билан тиқилиши оқибатидаги механик асфиксия сабаб бўлганлиги қайд қилинган.

Шунингдек, тергов давомида Т.Қ. ҳамда унинг турмуш ўртоғи Ш.И. фойдаланувида бўлган Samsung J250F русумли уяли телефон мутахассислар иштирокида кўздан кечирилганида 2019 йилнинг 12 декабридан 2020 йилнинг 25 мартига қадар қурилмадаги  YouTube иловаси орқали каналдан ва сувдан топилган мурдалар билан боғлиқ ўз жонига қасд қилиш ва шу мазмундаги 46 та видеоролик томоша қилинганлиги аниқланган.

Юқоридагиларга асосан, Т.Қ.нинг бедарак йўқолганлиги ва 4 июнда мурдаси топилганлиги ҳолатида жиноий ҳодиса юз бермаганлиги сабабли 30 июнь куни жиноят иши Жиноят-процессуал кодексининг 83-моддаси (Реабилитация учун асослар) 1-қисмига асосан тугатилган.