АҚШнинг коронавирусга қарши кураш бўйича ишчи гуруҳи эксперти, мамлакат бош инфекционисти Энтони Фаучи дунё ҳали ҳам коронавирус пандемиясининг дастлабки босқичида турганини маълум қилди.
«Биз Бразилияда, Жанубий Африкада ва ҳозир Осиёда (коронавирус бўйича) касаллик авж олганини кўрмоқдамиз, шу сабабли биз ҳозирча пасайишидан аввал катта эҳтимол билан кучайиши мумкин бўлган жаҳон пандемиясининг бошида турибмиз», — деган у Италиянинг Corriere della Sera газетасига.
Унинг таъкидлашича, агар дунё мамлакатлари пандемиянинг олдини олиш бўйича келишилган ҳолда чоралар кўрмаса, вирус яна бир неча ой давомида фаол тарқалишда давом этади. Бундан ташқари, Фаучи АҚШда коронавирус тарқалишини ҳали ҳам назоратга олиб бўлмаганини қайд этди.
«Афсуски, айрим штатлар фаолиятни тиклаш учун чекловларни юмшатиш нуқтаи назаридан жуда тез ҳаракат қила бошлади. Аксарият одамлар, айниқса ёшлар тавсияларга амал қилмади… Оқибатда Калифорния, Аризона, Флорида ва Техас каби штатларда инфекцияга чалинганлар сони ортаётганининг гувоҳи бўляпмиз», — деган у.
АҚШ коронавирусга чалинганлар ва ундан вафот этганлар сони бўйича дунёда биринчи ўринда бўлиб турибди. Worldometer статистикаси маълумотларига кўра, АҚШда 3,1 миллиондан ортиқ кишида коронавирус қайд этилган, шундан 134 минг нафардан ортиғи вафот этган.
Аввалроқ Энтони Фаучи коронавируснинг хавфли мутациясидан, АҚШда коронавирусга чалинганлар сони кунига 100 минг кишига етиши мумкинлигидан огоҳлантирганди.
Изоҳ (0)