AQShning koronavirusga qarshi kurash bo‘yicha ishchi guruhi eksperti, mamlakat bosh infeksionisti Entoni Fauchi dunyo hali ham koronavirus pandemiyasining dastlabki bosqichida turganini ma’lum qildi.
“Biz Braziliyada, Janubiy Afrikada va hozir Osiyoda (koronavirus bo‘yicha) kasallik avj olganini ko‘rmoqdamiz, shu sababli biz hozircha pasayishidan avval katta ehtimol bilan kuchayishi mumkin bo‘lgan jahon pandemiyasining boshida turibmiz”, — degan u Italiyaning Corriere della Sera gazetasiga.
Uning ta’kidlashicha, agar dunyo mamlakatlari pandemiyaning oldini olish bo‘yicha kelishilgan holda choralar ko‘rmasa, virus yana bir necha oy davomida faol tarqalishda davom etadi. Bundan tashqari, Fauchi AQShda koronavirus tarqalishini hali ham nazoratga olib bo‘lmaganini qayd etdi.
“Afsuski, ayrim shtatlar faoliyatni tiklash uchun cheklovlarni yumshatish nuqtayi nazaridan juda tez harakat qila boshladi. Aksariyat odamlar, ayniqsa yoshlar tavsiyalarga amal qilmadi… Oqibatda Kaliforniya, Arizona, Florida va Texas kabi shtatlarda infeksiyaga chalinganlar soni ortayotganining guvohi bo‘lyapmiz”, — degan u.
AQSh koronavirusga chalinganlar va undan vafot etganlar soni bo‘yicha dunyoda birinchi o‘rinda bo‘lib turibdi. Worldometer statistikasi ma’lumotlariga ko‘ra, AQShda 3,1 milliondan ortiq kishida koronavirus qayd etilgan, shundan 134 ming nafardan ortig‘i vafot etgan.
Avvalroq Entoni Fauchi koronavirusning xavfli mutatsiyasidan, AQShda koronavirusga chalinganlar soni kuniga 100 ming kishiga yetishi mumkinligidan ogohlantirgandi.
Izoh (0)