Жефф Безоснинг бойлиги 180 млрд доллардан ошди

Дунёнинг энг бадавлат инсони — Amazon раҳбари Жефф Безоснинг бойлиги 180 миллиард доллардан ошиб кетди, деб ёзади Forbes.

Таъкидланишича, Безоснинг бойлиги Amazon компанияси акциялари қийматининг ўсиши фонида ортган. Нашр ҳисоб-китобларига кўра, 8 июль куни Amazon капитализацияси 1,54 триллион долларга етган. Шундай қилиб, компаниянинг 11,1 фоиз акциясига эгалик қилувчи Безоснинг бойлиги 182,6 миллиард долларга етган. Бу Forbes томонидан юритилиб келинаётган шу турдаги статистикалар ичида рекорд кўрцаткич ҳисобланади.

Bloomberg’нинг ёзишича, Безоснинг бойлиги АҚШ ЯИМнинг 0,89 эквивалентига тенг ёки бутун дунёдаги энг бадавлат 500 кишининг жами бойлигининг 3 фоизини ташкил этади.

2019 йилнинг июлида тадбиркор хотини Маккензи Безос билан ажрашган эди. Келишув давомида у Amazon’нинг ўзига тегишли акциялар пакетининг чорак қисмини Маккензига берган эди. Ҳозирда Безоснинг собиқ рафиқасининг бойлиги 59,8 миллиард долларга тенг бўлиб, дунёдаги энг бадавлат аёллар рўйхатида иккинчи ўринда турибди. Дунёдаги энг бадавлат аёл эса Walmart корпорацияси асосчиси Сем Уолтоннинг қизи ҳисобланади (61,4 миллиард доллар).

Февраль ойининг бошларида Безос Amazon’нинг 1,74 миллиард долларлик акцияларини сотгани, апрелда эса бойлиги бир кунда 6,4 миллард долларга кўпайгани ҳақида хабар берилганди.