Жанубий Корея пойтахти Сеул шаҳри мэри Пак Вон Сун 9 июль, пайшанба куни бедарак йўқолди. Шаҳар полицияси шаҳар мэрини излаш ишларини олиб бормоқда. Бу ҳақда Reuters хабар берди.
«РИА Новости»нинг ёзишича, шаҳар мэри унинг қизи томонидан полицияга маҳаллий вақт билан соат 17:17 да берилган аризадан кейин бедарак йўқолган деб эълон қилинган. Мэрнинг қизи томонидан маълум қилинишича, унинг отаси уйдан 4-5 соат олдин чиқиб кетган ва васиятномага ўхшаш хабар қолдирган, унинг телефони эса айни пайтда ўчирилган.
Полиция Сеул шимолидаги Сонбук-гу туманида қидирув операциясини олиб бормоқда, шаҳар мэрининг телефонидан сўнгги марта ана шу ҳудуддан сигнал олинган. Полиция дронлар ва полиция итлари ёрдамида кенг қамровли қидирувни бошлаган.
Шаҳар маъмуриятининг хабар беришича, мэрнинг соат 16:40 да бўлиб ўтиши режалаштирилган учрашуви «шошилинч вазият» сабабли бекор қилинган. Шунингдек, Пак Вон Сун 9 июль куни ўзини ёмон ҳис қилгани сабабли ишга чиқмагани маълум қилинган.
Хитойнинг CGTN нашри Пак Вон Суннинг вафот этгани ҳақида хабар берган. Бироқ Жанубий Корея полицияси мэрнинг ўлик ҳолда топилгани ҳақидаги хабарни рад этган.
Пак Вон Сун Сеул мэри сифатида 2011 йилдан буён фаолият олиб бормоқда. У 2022 йилда бўлиб ўтадиган президентлик сайловида либераллар партиясидан асосий номзод ҳисобланади.
Изоҳ (0)