Саудия Арабистони коронавирус инфекцияси хавфини камайтириш мақсадида 2020 йилги Ҳаж мавсуми учун зиёратчиларга бир қатор қоидаларни жорий этди. Бу ҳақда Asharq Al-Awsat газетасига таяниб «ТАСС» хабар берди.
Унга кўра, Каъбани 7 маротаба айланиш (тавоф этиш) чоғида байтуллоҳни ўпиш ёки ҳеч бўлмаса уни қўли билан ушлашга уриниш тақиқланади. Хавфсизлик мақсадида, ҳеч ким яқинлашмаслиги учун Каъба тўсиқлар билан ўраб қўйилади.
Шайтонга тош отиш учун йиғилган мусулмонлар сони бир вақтнинг ўзида 50 кишидан ошмаслиги керак.
Зиёратчиларни олиб юрувчи автобуслар ўз сиғимининг 50 фоизгача бўлган миқдорда одам ташиши мумкин. Барча иштирокчилар тиббий ниқобларда бўлиши ва ижтимоий масофаланишга риоя этиши шарт. Уларнинг ҳарорати мунтазам ўлчаниб, саломатлигининг ҳолати назорат қилиб борилади.
Овқат ва ичимлик сувига доир масалада ҳам муайян тартиблар ўрнатилди. Озиқ-овқат ва ичимликлар фақатгина шахсий фойдаланиш учун ёпиқ идишларда берилади. Муқаддас Замзам суви учун ҳам фақат бир марталик идишларда тақдим этилади.
Муздалифа водийси ва Арофат тепалигида зиёратчилар ҳар 50 квадрат метрга 10 кишидан бўлиб жойлаштирилади. Бунда чодирлар орасида камида 1,5 метр масофа бўлиши лозим.
Ҳаж ибодатини адо этмоқчи бўлганлар шу ҳафта душанбадан жумагача махсус портал орқали рўйхатдан ўтиши лозим. Шундан сўнг улар орасидан Саудия Арабистони фуқароси бўлмаганлар танлаб олинади. Бу йилги Ҳаж зиёратида 10 минг нафар мусулмон қатнашади. Шундан 30 фоизи Саудия Арабистони фуқаролари, 70 фоизи эса подшоҳлик резидентлари бўлади.
Зиёратчиларни танлаб олишда 30-50 ёш оралиғида бўлган, сурункали касалликлари бўлмаган, аввал Ҳаж ибодатини адо этмаган, коронавирусга топширган тести манфий чиққан, Ҳаждан аввал ҳам, кейин ҳам 14 кунлик карантин даврини ўтай олишига урғу қаратилади.
Маълумот учун, Саудия Арабистонида коронавирусга чалинганлар сони 200 минг кишидан ошган. Мамлакатда 23 мартдан бошлаб жорий этилган комендантлик соати 21 июнь куни бекор қилинган. Аммо шунга қарамай, кўплаб чекловлар, хусусан, хорижга саёҳат қилиш ва зиёратларга қўйилган тақиқларни ўз кучида қолдирган.
Изоҳ (0)