Қозоғистон президенти Қосим-Жўмарт Тўқаев «Халқ соғлиғи ва соғлиқни сақлаш тизими ҳақидаги» кодексни имзолади, унда тамаки маҳсулотлари савдоси учун чекловни 18 ёшдан 21 ёшга ошириб қўйиш кўзда тутилган. Бу ҳақда Қозоғистон президентининг матбуот хизмати хабар қилди.
«Қозоғистон президенти «Халқ соғлиғи ва соғлиқни сақлаш тизими ҳақидаги» кодексни имзолади», – дейилган хабарда.
Аввал парламент ушбу қонун лойиҳасини тасдиқлаганди. Унда нафақат тамаки маҳсулотлари, хусусан, алкогол маҳсулотларини ҳам сотишни 21 ёшдан белгилаш таклиф қилинган, шунингдек, фуқаролар даволаниш ёки бошқа тиббиёт аралашувларига, жумладан, профилактик эмлашларга рози бўлиши ёки уларни рад қилиши мумкинлиги ҳам кодексда белгилаб қўйилган.
Ўзбекистонда Вазирлар Маҳкамасининг 2016 йил 10 июндаги 199-сон қарори билан «Ўзбекистон Республикасида чакана савдо қоидаларини ҳамда Ўзбекистон Республикасида умумий овқатланиш маҳсулотларини (хизматларни) ишлаб чиқариш ва сотиш қоидаларини тасдиқлаш тўғрисида»ги қарорга ўзгартириш ва қўшимчалар киритилган. Унга кўра, алкоголли маҳсулотларни ва тамаки маҳсулотларини сотаётган сотувчи кўриниши 20 ёшдан кичик кўринган харидордан унинг ёшини тасдиқловчи ҳужжатни кўрсатишни талаб қилиши, ҳужжат мавжуд бўлмаган тақдирда эса сотишни рад этиши шартлиги ҳақидаги мажбурият киритилган.
Изоҳ (0)