Saudiya Arabistoni koronavirus infeksiyasi xavfini kamaytirish maqsadida 2020-yilgi Haj mavsumi uchun ziyoratchilarga bir qator qoidalarni joriy etdi. Bu haqda Asharq Al-Awsat gazetasiga tayanib “TASS” xabar berdi.
Unga ko‘ra, Ka’bani 7 marotaba aylanish (tavof etish) chog‘ida baytullohni o‘pish yoki hech bo‘lmasa uni qo‘li bilan ushlashga urinish taqiqlanadi. Xavfsizlik maqsadida, hech kim yaqinlashmasligi uchun Ka’ba to‘siqlar bilan o‘rab qo‘yiladi.
Shaytonga tosh otish uchun yig‘ilgan musulmonlar soni bir vaqtning o‘zida 50 kishidan oshmasligi kerak.
Ziyoratchilarni olib yuruvchi avtobuslar o‘z sig‘imining 50 foizgacha bo‘lgan miqdorda odam tashishi mumkin. Barcha ishtirokchilar tibbiy niqoblarda bo‘lishi va ijtimoiy masofalanishga rioya etishi shart. Ularning harorati muntazam o‘lchanib, salomatligining holati nazorat qilib boriladi.
Ovqat va ichimlik suviga doir masalada ham muayyan tartiblar o‘rnatildi. Oziq-ovqat va ichimliklar faqatgina shaxsiy foydalanish uchun yopiq idishlarda beriladi. Muqaddas Zamzam suvi uchun ham faqat bir martalik idishlarda taqdim etiladi.
Muzdalifa vodiysi va Arofat tepaligida ziyoratchilar har 50 kvadrat metrga 10 kishidan bo‘lib joylashtiriladi. Bunda chodirlar orasida kamida 1,5 metr masofa bo‘lishi lozim.
Haj ibodatini ado etmoqchi bo‘lganlar shu hafta dushanbadan jumagacha maxsus portal orqali ro‘yxatdan o‘tishi lozim. Shundan so‘ng ular orasidan Saudiya Arabistoni fuqarosi bo‘lmaganlar tanlab olinadi. Bu yilgi Haj ziyoratida 10 ming nafar musulmon qatnashadi. Shundan 30 foizi Saudiya Arabistoni fuqarolari, 70 foizi esa podshohlik rezidentlari bo‘ladi.
Ziyoratchilarni tanlab olishda 30-50 yosh oralig‘ida bo‘lgan, surunkali kasalliklari bo‘lmagan, avval Haj ibodatini ado etmagan, koronavirusga topshirgan testi manfiy chiqqan, Hajdan avval ham, keyin ham 14 kunlik karantin davrini o‘tay olishiga urg‘u qaratiladi.
Ma’lumot uchun, Saudiya Arabistonida koronavirusga chalinganlar soni 200 ming kishidan oshgan. Mamlakatda 23-martdan boshlab joriy etilgan komendantlik soati 21-iyun kuni bekor qilingan. Ammo shunga qaramay, ko‘plab cheklovlar, xususan, xorijga sayohat qilish va ziyoratlarga qo‘yilgan taqiqlarni o‘z kuchida qoldirgan.
Izoh (0)