Интернетда «Москва Сити» ишбилармонлик маркази ҳудудида бозорга К5 номи остида сотувга чиқадиган янги Kia Optima ҳаракатланаётгани тасвирланган суратлар пайдо бўлди. Гувоҳларнинг сўзларига кўра, седан реклама фотосессиясида иштирок этган, бу эса моделнинг савдолари тез орада бошланишидан далолат беради, деб хабар қилади Motor.
Kia К5 — компания Optima номидан воз кечиб, барча бозорлар учун ягона номга ўтган — Жанубий Корея вариантидан фарқ қилмайди. Седанга икки турдаги двигатель ўрнатилиши маълум қилинган: 2,0 ва 2,5 литрли атмосфера двигатели. Кичкина двигатель Hyundai Sonata’га (150 от кучи ва 192 Нм айланувчи момент) ҳам ўрнатилган бўлиб, у олти поғонали автомат узатмалар қутиси ёрдамида бошқарилади; катта вариант эса 194 от кучига эга ва у саккиз поғонали автоматик трансмиссия билан биргаликда ишлайди.
Россияда Kia К5 модели ҳозирда эски Optima йиғилаётган Калининграддаги «Автотор» заводида ишлаб чиқарилади. Ишлаб чиқарувчининг сўзларига кўра, савдолар 2020 йилнинг ёз фасли охирларидан бошланади.
Бундан олдинги Kia Optima моделига 150 от кучига эга 2,0 литрли ёки 188 от кучига эга 2,4 литрли агрегат ўрнатилган эди. Унинг нархи 19 минг доллар атрофида. Optima седани Россия бозорларида энг кўп сотиладиган Kia моделларидан ҳисобланади: 2020 йилнинг ўтган беш ойи давомида 6 мингдан ортиқ шу турдаги моделдан сотилган.
Эслатиб ўтамиз, Москвада энг кўп ўғирланадиган автомобилларнинг 2018 йилги рейтингидан Kia Optima ҳам ўрин олган, 2019 йилда эса ушбу рўйхатда Optima ўрнини Kia Rio эгаллаган эди.
Изоҳ (0)