Тошкент шаҳар Учтепа туманида Spark машинаси 2 ёшли болани уриб кетиши оқибатида бола касалхонада вафот этди. Бу ҳақда Тошкент шаҳар ИИББ хабар берди.
Маълум қилинишича, 2 июль куни соат 12.00 да Учтепа тумани Хондамир кўчасида Spark автомобили ҳайдовчиси 38 ёшли Зафар Н. пиёдани уриб юборган. ЙТҲ натижасида 2 ёшли С.Х. тан жароҳатлари олиб, шифохонада ҳаётдан кўз юмган.
ИИББнинг маълум қилишича, ЙТҲга ҳайдовчининг тўсатдан йўлга чиқиб қолган болани кўрмай қолгани сабаб бўлган, бола маҳалла ичида қаровсиз қолдирилган.
Мазкур ҳолат юзасидан Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш) бўйича жиноий иш қўзғатилган.
Аввалроқ Самарқандда Malibu ва MAN тўқнашиши оқибатида 3 киши, Бухорода Damas эшак аравани уриб юбориши оқибатида 25 ёшли аёл, Cobalt’нинг юк машинасига урилиши оқибатида 3 киши, Фарғонада эса Damas’лар иштирокидаги ЙТҲда ҳайдовчилардан бири, Сурхондарёда эса «ВАЗ-2101» Malibu билан тўқнашиб, ёниб кетиши оқибатида ҳайдовчи ва йўловчи вафот этгани ҳақида хабарлар берилган эди.
Изоҳ (0)