Тошкент вилоятининг Зангиота туманида «қизил» ҳудуд тоифасига киритилган маҳалла фуқаролар йиғинларидаги мавжуд кўчалар бетон тўсиқлар билан тўсилиб, фуқаролар ҳаракати вазият барқарор бўлгунга қадар чекланади. Бу ҳақда туман ҳокимлиги матбуот хизмати хабар берди.
Қайд этилишича, Зангиота тумани ҳокимининг 2020 йил 3 июлдаги фармойишига асосан ҳамда коронавируснинг олдини олиш бўйича штаб хулосасига кўра, 4 июлдан туманда коронавирус инфекцияси тарқалишининг олдини олиш мақсадида карантин талаблари кучайтирилади.
Айни пайтда Зангиота тумани жами 20 та: «Қаҳрамон», «Эркин гузари», «Асил», «Ўратепа», «Деҳқонобод», «Навбаҳор», «Алимбува», «Дўстлик», «Тўқимачи», «Қиргузар», «Мевазор», «Файзли», «Ўрта», «Алоқа», «Саховат», «Қумариқ», «Токзор», «Амир Темур», «Боғзор», «Нурафшон» маҳалла фуқаролар йиғинлари «қизил» тоифага киритилган.
Маълумот учун, Ўзбекистонда 4 июль соат 10:00 ҳолатига кўра, коронавирус инфекцияси қайд этилганлар сони 9500 нафарни ташкил этмоқда. Уларнинг 6251 нафари (66 фоиз) соғайган, 29 нафар бемор касаллик асоратлари оқибатида вафот этган.
Аввалроқ Республика махсус комиссиясининг 22 июнь қарорига мувофиқ, Тошкент шаҳрида коронавирус аниқланган «қизил» ҳудудларга блокпостлар қайта ўрнатилиши ҳақида хабар берилган эди.
Изоҳ (0)