Ижтимоий тармоқларда Сурхондарё вилоятининг Сариосиё туманидаги жанжал ҳолати акс этган видеолавҳа тарқалди. ИИВ ҳузуридаги Тергов департаменти ушбу видеолавҳада акс этган воқеа бўйича расмий маълумот берди.
Маълум бўлишича, 21 июнь куни соат 17:30 да Сурхондарё вилояти Сариосиё тумани «Лутфикор» маҳалласидан ўтувчи Сариосиё—Узун йўналишидаги автомобиль йўлида 31 ёшли М.Я. Nexia машинасини ҳайдаб кетаётганида ўзи билан бир йўналишда Cobalt’ни бошқариб кетаётган 21 ёшли Р.М. чиқиб қолган.
Улар бир-бирига йўл бермаслиги оқибатида ўзаро тортишиб қолган, сўнг Nexia ҳайдовчиси М.Я.нинг шу яқин атрофда турувчи 55 ёшли амакиси О.Я.нинг уйи ёнида тўхтаган Cobalt’дан Р.М. ва унинг укаси 18 ёшли У.М. тушиб, Nexia ҳайдовчиси М.Я. ва унинг амакиси билан ўзаро жанжаллашиб, бир-бирига қасддан тан жароҳати етказган.
Шу куннинг ўзида соат 18:30 да Cobalt эгаси Р.М. укаси У.М., 41 ёшли отаси О.Х. ва 32 ёшли амакиси Х.О. билан Nexia ҳайдовчиси М.Я.нинг амакисиникига бориб, унинг қариндоши бўлган 31 ёшли О.Н.нинг танасининг дуч келган жойларига қасддан уриб, тан жароҳати етказган.
Шундан сўнг соат 20:20 да М.Я. ва унинг жанжалдан хабар топган 5 нафар қариндоши биргаликда О.Х.га тегишли бўлган кичик корхона биноси олдига бориб, О.Х. ва унинг ўғиллари Р.М., У.М.га қўл ва оёқлари билан баданларининг турли соҳаларига қасддан уриб, тан жароҳатлари етказган.
Хабарда айтилишича, мазкур ҳолат юзасидан ҳозирда Сариосиё тумани ИИБ ҳузуридаги Тергов бўлинмаси томонидан терговга қадар текширув ҳаракатлари олиб борилмоқда ва Жиноят кодексининг тегишли моддалари билан жиноят иши қўзғатиш чоралари кўрилмоқда.
Изоҳ (0)