Президент Шавкат Мирзиёев 2 июль, пайшанба куни Ўзбекистоннинг инвестицион ва ташқи савдо фаолияти прогноз кўрсаткичларининг 2020 йил I ярмидаги ижросини муҳокама қилиш, шунингдек, Япония, Корея Республикаси ва Бирлашган Араб Амирликлари билан устувор қўшма лойиҳаларнинг бориши ҳамда савдо-иқтисодий, инвестицион ва молиявий-техник ҳамкорликни кенгайтириш истиқболларини кўриб чиқишга бағишланган видеоанжуман тарзидаги йиғилиш ўтказди, деб хабар бермоқда Президент матбуот хизмати.
Тадбирда Инвестициялар ва ташқи савдо вазирлиги олдига қўйилган вазифалар ижроси тўғрисидаги ҳисоботлар, шу жумладан, инвестицияларни жалб этиш ва экспорт бўйича прогноз кўрсаткичларни ҳамда хорижий шериклар билан эришилган келишувларни ўз вақтида амалга оширишга қаратилган комплекс чора-тадбирларга доир таклифлар эшитилган.
Йиғилишда глобал миқёсдаги эпидемиологик вазият ва ундан келиб чиқаётган чекловлар Ўзбекистоннинг инвестицион ва ташқи савдо фаолиятига бевосита таъсир кўрсатиб, тадбиркорлар учун молиялаштириш, қурилиш, ишлаб чиқаришда зарур хом ашё ва ускуналарни етказиб бериш масалаларида маълум тўсиқлар яратаётгани таъкидланди. Жумладан, Ўзбекистон ишлаб чиқарувчилари ва экспортчиларини ўз вақтида қўллаб-қувватлаш бўйича чоралар кўрилгани, тижорат банкларини етарли ресурслар билан таъминлаш мақсадида халқаро молиявий институтларнинг 1,2 миллиард доллар миқдоридаги маблағлари жалб этилгани, ҳисобот даврида умумий қиймати 1,8 миллиард долларлик 28 та йирик инвестиция лойиҳаларини амалга ошириш ҳисобига 3,8 мингта янги иш ўрни яратилишига эришилгани айтиб ўтилди.
2020 йилнинг I ярим йиллиги ҳисоботига кўра, ҳудудларни ривожлантириш дастурлари доирасида умумий қиймати 9,5 триллион сўмлик 2049 та йирик инвестиция лойиҳаси амалга оширилиб, 27 мингта янги иш ўрни яратилган.
Бугунги кунда қатор тармоқларда коронавирус пандемияси билан боғлиқ хатарлар таъсири остида инвестицияларни ўзлаштиришнинг прогноз кўрсаткичларини бажариш кечикаётгани таъкидланди. Президент томонидан 2020 йил якунига кўра кўзланган натижаларга сўзсиз эришиш мақсадида амалга оширилиши режалаштирилган инвестиция лойиҳаларининг кўрсаткичлари ва рўйхатларини қайта кўриб чиқиш вазифаси юклатилган.
«Йил якунига келиб Ўзбекистон иқтисодиётига жалб қилинган инвестициялар ҳажми 9,9 миллиард долларни, шу жумладан, тўғридан-тўғри хорижий инвестициялар — 6,8 миллиард, халқаро молиявий институтлар маблағлари — 3,1 миллиард долларни ташкил этиши кутилмоқда. Иқтисодий тараққиётнинг муҳим драйверларидан бири сифатида экспорт фаолиятини қўллаб-қувватлаш чораларига алоҳида эътибор қаратилди.
2020 йилнинг 6 ойи якунларига кўра, мамлакатимиз корхоналари томонидан 6,1 миллиард долларлик маҳсулот экспорт қилинган. Айни пайтда экспорт фаолиятига 950 та янги корхона жалб этилди, хорижга янги 85 та номдаги маҳсулот етказиб бериш ўзлаштирилди, шунингдек, қўшимча 4 та давлат бозорига чиқилди», — дейилади хабарда.
Йиғилишда Республика комиссиясига жаҳондаги иқтисодий вазиятнинг беқарорлиги ҳамда глобал бозордаги талаб ва таклифнинг пасайишини эътиборга олиб, 2020 йилнинг иккинчи ярмида экспорт салоҳиятини ошириш мақсадида пандемия оқибатидаги ташқи омиллар Ўзбекистон ташқи иқтисодий фаолиятига кўрсатиши мумкин бўлган салбий таъсирни камайтириш бўйича чора-тадбирлар мажмуини ишлаб чиқиш ва амалга ошириш вазифаси юклатилган.
Чора-тадбирлар мажмуи ижроси таъминланса, Ўзбекистон экспорти йил якунига бориб 17,1 миллиард долларни ташкил этиши кутилмоқда.
Япония, Корея Республикаси ва Бирлашган Араб Амирликлари билан ўзаро товар айирбошлаш кўрсаткичлари муттасил ошиб бораётгани, олий даражадаги учрашувлар якунлари бўйича қабул қилинган «йўл харита»лари доирасида турли тармоқларда янги кооперация лойиҳалари амалга оширилаётгани, инвестицион ҳамкорликни мустаҳкамлаш бўйича янги таклифлар ишлаб чиқишга алоҳида эътибор қаратиш зарурлиги қайд этилди.
Ўзбекистонда япониялик ҳамкорлар билан биргаликда геология, кимё ва нефть-кимё, банк-молия, соғлиқни сақлаш ва таълим каби соҳаларда умумий қиймати 5,6 миллиард долларлик 48 та лойиҳа амалга оширилаётгани таъкидланди.
Хусусан, HIS компанияси билан меҳмонхона мажмуаларини қуриш, Isuzu ва Itochu компаниялари билан SamAvto қўшма корхонасининг ишлаб чиқариш қувватларини кенгайтириш, Япония халқаро ҳамкорлик агентлиги (JICA) билан Навоий иссиқлик электр станциясида энергетик блоклар барпо этиш бўйича ва кўплаб бошқа лойиҳалар муваффақиятли амалга оширилаётгани таъкидлаб ўтилди.
Шавкат Мирзиёев аниқ иқтисодий дастур ва лойиҳаларни илгари суриш орқали Ўзбекистон—Япония амалий ҳамкорлигини кенгайтириш зарурлигини алоҳида таъкидлади.
Корея Республикаси билан икки томонлама ҳамкорлик ҳам кейинги йилларда ижобий суръат билан ривожланаётгани, 2020 йилнинг бошидан буён товар айирбошлаш қарийб 1 миллиард долларга етгани, Ўзбекистонда Жанубий Корея капитали иштирокида 60 та янги корхона ташкил этилиб, уларнинг умумий сони эса 855 тани ташкил қилаётгани айтилди.
2020 йилда Тошкент шаҳрида кўп тармоқли болалар тиббиёт маркази ҳамда Фарғона шаҳрида Ўзбекистон—Корея халқаро университетини ташкил этиш бўйича лойиҳалар муваффақиятли амалга оширилгани, улар доирасида мингга яқин янги иш ўринлари яратилгани таъкидланди.
«Ўзбекистон Республикаси Президенти томонидан 2020 йил 17 апрель куни Тошкент вилояти Зангиота туманидаги Инновацион илмий ишлаб чиқариш фармацевтика кластерини қуриш ишлари жадал давом этмоқда. Ушбу лойиҳа доирасида Фармацевтика техника университети ҳамда дори воситаларини ишлаб чиқариш бўйича замонавий қувватларни ташкил этиш кўзда тутилган.
Қишлоқ хўжалиги, АКТ, соғлиқни сақлаш, кимё, енгил, электротехника, фармацевтика ва заргарлик саноати, таълим ва инновациялар каби соҳалар ҳамкорликнинг истиқболли йўналишлари сифатида белгиланди.
Корея халқаро ҳамкорлик агентлиги (KOICA) ва Иқтисодий тараққиёт фонди орқали молиявий-техник кўмак дастурлари доирасида умумий қиймати 750 миллион доллардан ортиқ бўлган 17 та лойиҳа, жумладан, Кимёвий технологиялар маркази, ёши катталар учун клиника ташкил этиш, юртимиз тиббиёт ва таълим муассасаларини жиҳозлаш лойиҳалари амалга оширилмоқда.
Япония ва Жанубий Корея билан қўшма лойиҳаларнинг амалга оширилиши натижасида жами 1 миллиард доллардан зиёд хорижий инвестицияларни ўзлаштириш кўзда тутилмоқда.
Умуман, эришилган келишувларни тўлиқ рўёбга чиқариш 50 мингдан ортиқ янги иш ўринларини яратиш, ишлаб чиқариш ҳажмларини 4,1 миллиард долларга, экспорт ҳажмини эса 1,14 миллиард долларга ошириш имконини беради», — дейилган Президент матбуот хизмати ахборотида.
Шунингдек, матбуот хизмати хабарида қайд этилишича, 2019 йилда Бирлашган Араб Амирликларига амалга оширилган олий даражали ташриф якунида салмоқли икки томонлама ҳужжатлар тўплами, шу жумладан, савдо-иқтисодий ва инвестицион битимлар имзоланган. Энергетика, инфратузилма, кимё ва нефть-кимё, қишлоқ хўжалиги, туризм ва бошқа соҳаларда қўшма лойиҳаларни амалга ошириш режалаштирилмоқда.
Бугунги кунда умумий қиймати 4 миллиард доллардан ортиқ аниқ лойиҳалар ишлаб чиқилиб, БАА сармояси иштирокидаги корхоналар сони 141 тани ташкил этмоқда.
Президент Амирликлар компаниялари билан келишувлар ўз натижасини бераётганини таъкидлади.
Хусусан, Masdar компанияси Навоий вилоятида 500 МВт қувватига эга шамол электр станцияси қурилишига инвестиция киритаётгани, сармояларнинг умумий ҳажми эса 500 миллион доллардан ошиши, Абу-Даби тараққиёт фонди иштирокида эълон қилинган капитали 1 миллиард доллар бўлган қўшма инвестиция компанияси таъсис этилгани, компания илк лойиҳаларни молиялаштиришни бошлагани, шунингдек, Абу-Даби тараққиёт фонди Самарқанд шаҳрининг инфратузилмасини модернизация қилишда иштирок этаётгани, БААнинг Mubadala давлат инвестицион компанияси билан энергетика соҳасида ҳамда углеводородлар қазиб олишни кўпайтириш ва уларни чуқур қайта ишлашни ташкил этиш бўйича лойиҳалар ишлаб чиқаётгани қайд этилди.
Президент Шавкат Мирзиёев Япония, Корея Республикаси ва БАА билан ҳамкорлик бўйича «йўл хариталари»нинг 2020 йил учун белгиланган чора-тадбирларини тўлиқ ва сифатли бажариш зарурлигини таъкидлади.
Йиғилишда муҳокама қилинган масалалар бўйича мутасадди вазирлик ва идоралар раҳбарларининг ҳисоботлари тингланди, аниқ вазифа ва чора-тадбирлар белгилаб берилди.
Эслатиб ўтамиз, Корея Республикаси президент Мун Чже Ин 2019 йил апрель ойида Ўзбекистонга расмий ташриф билан келганди.
2019 йил март ойида Шавкат Мирзиёев расмий ташриф билан Бирлашган Араб Амирликларига борган, Абу-Даби шаҳрида мазкур амирлик валиаҳди, Бирлашган Араб Амирликлари Қуролли Кучлари олий бош қўмондони ўринбосари Шайх Муҳаммад бин Зайд Ол Наҳаён, Дубай шаҳрида БАА вице-президенти, бош вазири, Дубай амири Шайх Муҳаммад бин Рошид Ол Мактум ва бошқа расмий шахслар билан учрашувлар ўтказганди.
Шавкат Мирзиёев 2019 йил декабрь ойида расмий ташриф билан Японияга борган. Президент у ерда Нобель мукофоти совриндорлари етишиб чиққан Нагоя университетида ўқиётган ўзбекистонлик ёшлар билан учрашган, мазкур университетнинг фахрий доктори бўлган, JETRO, JICA, JABIC, NEDO, JOGMEC, Mitsubishi, Itochu, Sumitomo, Marubeni, Isuzu каби корпорация ва компанияларни Ўзбекистонга таклиф этган, Япония парламенти вакиллар палатаси раиси, Япония Маслаҳатчилар палатаси президенти ва мамлакат бош вазири Синдзо Абэ билан суҳбатлар қурган. Шунингдек, Япония императори Нарухито ва унинг рафиқаси Масако хоним билан учрашув ўтказганди.
2020 йил 13 апрелда эса Шавкат Мирзиёевнинг Жанубий Кореяга сафар қилиши режалаштирилгани хабар қилинган. Аввал президент 2020 йилнинг февраль ойида Япония ва Жанубий Корея билан иқтисодий ҳамкорлик истиқболлари юзасидан йиғилиш ўтказганди.
Изоҳ (0)