Қарши шаҳрига кириш-чиқиш жиддий назоратга олинади. Фаолияти тўхтатилган айрим назорат масканлари («постлар») қайта тикланади. Бу ҳақда Қашқадарё вилояти махсус комиссияси тегишли қарор қабул қилди, деб хабар беради вилоят ҳокимлиги матбуот хизмати.
Маълумот учун, Қашқадарё вилоятида шу вақтгача коронавирус билан касалланиш бўйича жами 201 та ҳолат қайд этилган. Айни вақтда вилоятда коронавирус инфекциясидан тузалганлар сони 119 нафарни ташкил этмоқда, 81 нафар бемор даволанишда. Шунингдек, бир бемор вафот этган.
Санитария-эпидемиологик осойишталик агентлигининг 26 июндаги қарорига кўра, Қарши шаҳри «яшил» ҳудуд сифатида белгиланганди.
Аввалроқ Нукус шаҳрида карантин чоралари кучайтирилиши, Бухорода транспортлар қатнови ва бозорлар фаолияти вақтинча тўхтатилгани, Жиззах шаҳрига кириб-чиқишда назорат қатъийлаштирилгани, Ўзбекистоннинг «сариқ» ҳудудларида соат 22:00 дан кейин махсус рухсатномасиз юрган автомобилларга қарши назорат кучайтирилиши ҳақида хабарлар берилганди.
Ўзбекистонда 3 июль соат 10:00 ҳолатига кўра, коронавирус инфекцияси қайд этилганлар сони 9199 нафарга етди, 6034 нафар коронавирус инфекциясига чалинган фуқаро соғайган, ҳозирга қадар мамлакатда жами 27 нафар бемор касаллик асоратлари оқибатида ҳаётдан кўз юмган.
Изоҳ (0)