Қатор давлат ташкилотлари ҳамкорлигида 2 июль куни журналистлар учун Тошкент вилоятининг Бўстонлиқ туманида ноқонуний дала-ҳовлиларнинг бузилиши юзасидан пресс-тур ташкил этилди. Тадбирда бош вазир ўринбосари — Туризмни ривожлантириш давлат қўмитаси раиси Азиз Абдуҳакимов ҳам қатнашиб, ҳудуддаги шов-шувли «снос»лар масаласига изоҳ берди. Бу ҳақда «Дарё» мухбири Миролим Исажонов хабар бермоқда.
«Кўп йиллар давомида Бўстонлиқ туманида ноқонуний қурилиш ишларини қилиш оддий ҳолатга айланган. Қонун устуворлиги таъминламагани учун кўпчилик: ‘Қонунни бузсак, давлат органларида ҳам ўзимизга ўхшаган одамлар ишлайди, бориб келишамиз, бирор эҳтиёжини қилиб берамиз’, деган фикрда юрган.
Ўрганишлар жараёнида бир нарсадан ҳайрон бўлдик, очиғи. Нафақат Бўстонлиқда, балки бошқа ҳудудларда ҳам фуқаролар ноқонуний тарзда эгалламоқчи бўлган ерларига аввалига тош териб қўяркан, кейин секингина ёғоч тахлайди, ундан сўнг ғишт теради ва устини ёпади — шу билан иморат тайёр. Сўнгра турли йўллар билан эгалик ҳуқуқини қўлга киритишади.
Бу каби ноқонуний қурилишлар нима сабабдан келиб чиқмоқда? Қурилиш учун ерлар қонуний ажратилмаган, очиқ аукционга қўйилмаган. Ҳокимият томонидан қонуний ерлар кўрсатилмагани ва эътибордан четда қолдирилгани боис одамлар турли йўллар билан ноқонуний қурилиш қилган. Бу каби ҳолатларни ҳозир олдини олмасак, кейинчалик яна давом этаверади.
Оддий ўқитувчи, шифокор ходимлар бу ердаги қиммат ‘дача’ларга келиб, ҳордиқ чиқара олмайди. Санаторий типдаги дам олиш масканларидан воз кечиб, уч-тўрт қаватли замонавий меҳмонхоналар қуришни режалаштиряпмиз. Бу борада халқаро тажрибани ҳам ўрганиб чиқдик. Англия, Франция, Германия, Туркиядан жалб этилган мутахассислар фикрларини ҳам эшитдик», — деди Абдуҳакимов.
Изоҳ (0)