Хитойда сўнгги суткада коронавирус билан касалланиш бўйича 3 та ва касаллик белгисиз ўтаётган 2 та ҳолат аниқланди, беморларнинг 8 нафари соғайди, вафот этиш ҳолатлари қайд этилмади. Бу ҳақда Хитой Соғлиқни сақлаш миллий комиссиясининг 2 июлдаги маълумотига таяниб, «РИА Новости» хабар берди.
Қайд этилишича, аниқланган 3 та ҳолатнинг бири мамлакатнинг ўзида, Пекин шаҳрида, қолган 2 киши вирусни четдан юқтирган.
Мамлакатда умумий ҳисобда 83 537 киши коронавирусга чалинган, уларнинг 78 487 нафари соғайган, 4634 нафар бемор COVID-19 қурбонига айланган. Касалхонада 416 киши даволанишда қолмоқда.
Шунингдек, Хитойда касаллик белгисиз ўтаётган 2 та ҳолат аниқланган. Шундай кишиларнинг яна 99 нафари кузатувда бўлиб турибди.
Аввалроқ Хитойда чўчқа гриппининг янги штамми аниқлангани, у янги пандемияни юзага келтириши мумкинлиги хабар берилганди. Кейинроқ Хитой ҳукумати чўчқа гриппининг янги штамми пандемияни юзага келтириши мумкинлиги ҳақидаги тадқиқот натижаларини ишончсиз деб топди.
Жанубий Кореяда эса сутка давомида 54 киши коронавирусга чалингани қайд этилиб, касалланганларнинг умумий сони 12 904 нафарга етди.Сутка давомида 71 киши соғайиб, тузалганларнинг умумий сони 11 684 нафарга етди. Касаллик қурбонлари сони ўзгармаган бўлиб, 282 нафарни ташкил этмоқда.
KCDC маълумотларига кўра, Жанубий Корея 1 июлдан бошлаб «Ремдесивир» дори воситасини сотиб олишни бошлади. «Ремдесивир» Европа Иттифоқида рухсат олиш учун тавсия қилинган коронавирусга қарши илк дори воситаси ҳисобланади. Бу дори воситаси оғир аҳволдаги беморларни даволашда қўлланилади.
Қайд этилишича, 7 июлга қадар касалхоналар «Ремдесивир» билан бепул таъминланади, 8 июлдан бошлаб эса унинг нархи муҳокама қилинади.
Эслатиб ўтамиз, «Ремдесивир» 1 май куни АҚШда COVID-19’ни даволаш учун фавқулодда маъқулланган. У ўз даврида Эбола безгагини даволаш учун яратилган эди. Лекин у пайтда самарали эканлигини исботлай олмаган. Кейинчалик мазкур дори РНК тузилиши коронавирусникига ўхшаш Яқин Шарқ респиратор синдроми (MERS) ва SARS-CoV атипик пневмониясига қарши даволашда ўз самарадорлигини кўрсатган.
Препарат Американинг Gilead Sciences биофармацевтик компанияси томонидан ишлаб чиқарилади.
Изоҳ (0)