Xitoyda 3 kishida, Janubiy Koreyada esa 54 kishida koronavirus aniqlandi

Xitoyda so‘nggi sutkada koronavirus bilan kasallanish bo‘yicha 3 ta va kasallik belgisiz o‘tayotgan 2 ta holat aniqlandi, bemorlarning 8 nafari sog‘aydi, vafot etish holatlari qayd etilmadi. Bu haqda Xitoy Sog‘liqni saqlash milliy komissiyasining 2-iyuldagi ma’lumotiga tayanib, “RIA Novosti” xabar berdi.

Qayd etilishicha, aniqlangan 3 ta holatning biri mamlakatning o‘zida, Pekin shahrida, qolgan 2 kishi virusni chetdan yuqtirgan.

Mamlakatda umumiy hisobda 83 537 kishi koronavirusga chalingan, ularning 78 487 nafari sog‘aygan, 4634 nafar bemor COVID-19 qurboniga aylangan. Kasalxonada 416 kishi davolanishda qolmoqda.

Shuningdek, Xitoyda kasallik belgisiz o‘tayotgan 2 ta holat aniqlangan. Shunday kishilarning yana 99 nafari kuzatuvda bo‘lib turibdi.

Avvalroq Xitoyda cho‘chqa grippining yangi shtammi aniqlangani, u yangi pandemiyani yuzaga keltirishi mumkinligi xabar berilgandi. Keyinroq Xitoy hukumati cho‘chqa grippining yangi shtammi pandemiyani yuzaga keltirishi mumkinligi haqidagi tadqiqot natijalarini ishonchsiz deb topdi.

Sutka davomida 71 kishi sog‘ayib, tuzalganlarning umumiy soni 11 684 nafarga yetdi. Kasallik qurbonlari soni o‘zgarmagan bo‘lib, 282 nafarni tashkil etmoqda.

KCDC ma’lumotlariga ko‘ra, Janubiy Koreya 1-iyuldan boshlab “Remdesivir” dori vositasini sotib olishni boshladi. “Remdesivir” Yevropa Ittifoqida ruxsat olish uchun tavsiya qilingan koronavirusga qarshi ilk dori vositasi hisoblanadi. Bu dori vositasi og‘ir ahvoldagi bemorlarni davolashda qo‘llaniladi.

Qayd etilishicha, 7-iyulga qadar kasalxonalar “Remdesivir” bilan bepul ta’minlanadi, 8-iyuldan boshlab esa uning narxi muhokama qilinadi.