Британиянинг Pensions & Investment Research Consultants (PIRC) компанияси Tesla акциядорларига компания асосчиси ва бош директори Илон Маскни директорлар кенгашидан чиқариб юборишни маслаҳат берди. Бу ҳақда PIRC ҳисоботига таяниб, The Guardian хабар берди.
Консультантларнинг ўз позициясини Маскнинг 2018 йилда Tesla’ни асосий акциядорлари билан амалга оширган битими орқали тушунтириб берган. 10 йилга мўлжалланган битимга кўра, Маскнинг мукофот пуллари Tesla’нинг молиявий мақсадларига боғланган. Компаниянинг бозордаги қиймати 650 миллиард долларга етса (келишув амалга оширилган вақтда у 50 миллиард доллар турган), Маск умумий ҳисобда 55,8 миллиард доллар ишлаб олиши мумкин бўлган.
PIRC’нинг хулосаси бўйича, ушбу битим Маскни «ноқонуний равишда бойитади». Консультантлар Илон Маскни нафақат Tesla директорлар кенгашидан чиқариб юбориш, балки битимни бекор қилишни ҳам тавсия этган.
Бундан ташқари, PIRC’нинг ҳисоблашича, Маск ўзининг твитлари орқали Tesla ва унинг акциядорлари обрўсига жиддий хавф туғдиради. Хусусан, ҳисоботда бизнесменнинг Tesla акцияларини сотиб олиш ва коронавирус борасидаги позицияси мисол қилиб келтирилган.
Tesla акциядорларининг йиғилиши 7 июль куни бўлиб ўтиши режалаштирилган эди, бироқ у сентябрга қадар қолдирилган.
Эслатиб ўтамиз, Илон Маск Twitter’даги саҳифасида 2018 йилнинг август ойида Tesla акцияларини бир донасини биржадан 420 доллардан сотиб олишга тайёрлигини билдирган. АҚШ қимматли қоғозлар ва биржа бўйича комиссияси Илон Маск инвесторлар билан Tesla акцияларини сотиб олиш режаларини муҳокама қилмаганлигини, у ўзининг твити билан бозор иштирокчиларини атай янглиш фикрга боришга мажбур қилганини билдирган.
Ҳукумат ўртасидаги низога барҳам бериш мақсадида Маск 20 миллион доллар тўлаган ва Tesla директорлар кенгаши раҳбари лавозимини тарк этган (у компания бош директори вазифасида қолган).
Изоҳ (0)